ანასტასია კაიშაური

დაბადების ადგილი: სოფელი ქვეშეთი, დუშეთის რაიონი.

დაამთავრა თბილისის ქალთა მეოთხე გიმნაზია და პეტროგრადის უნივერსიტეტის ისტორიულ-ფილოლოგიური ფაკულტეტი 1917 წელს.

1919 წელს დაინიშნა თბილისის ქალთა მე-2 გიმნაზიის ფსიქოლოგიისა და ლოგიკის მასწავლებლად. 1926 წელს, განათლების სახალხო კომისარიატმა სტიპენდიით მიავლინა მოსკოვის სამედიცინო პედაგოგიკისა და მოსკოვის მე-2 უნივერსიტეტში ლოგოპედიისა და სურდოპედაგოგიკის შესასწავლად (პროფესორები: თ. რაუსი, ვ. კაშჩენკო). 1928-1940წწ. მუშაობდა თბილისის ყრუ-მუნჯთა სკოლაში სპეციალისტად; 1929-1933წწ. საქართველოს განათლების სახალხო კომისარიატის პედაგოგიკის სამეცნიერო-კვლევით ინსტიტუტში; 1931 წლიდან ლოგოპედიის პედაგოგად ფუნქციონალურ-ნერვულ დაავადებათა ინსტიტუტში, სამეცნიერო აკადემიასა და ბავშვთა პოლიკლინიკებში; 1930 წელს მოსკოვში დეფექტოლოგთა ყრილობაზე გამოვიდა მოხსენებით: "დეფექტოლოგიური მუშაობა საქართველოში" - აღნიშნულ ყრილობაზე ანასტასია კაიშაური დასახელებულ იქნა დელეგატად, მომდევნო ყრილობაზე წაიკითხა მოხსენება: "ქართულ ბგერათა სპეციფიკურობა";  ფუნქციონალურ-ნერვულ დაავადებათა ინსტიტუტში წაიკითხა მოხსენებები: "ენაბლუობა, მისი პროფილაქტიკა და მკურნალობა" (1932), "ენაჩლუნგობის ტიპოლოგიისათვის" (1934), "მეტყველების ფონასეთიური მოშლილობა"(1936) და სხვ. საქართველოს მეცნიერებათა აკადემიის საზოგადოებრივ მეცნიერების განყოფილების მე-6 სამეცნიერო სესიაზე, 1942 24-25 აპრილს წაიკითხა  მოხსენება "კონტუზირებულთა მეტყველების აღდგენა ხმოვანი ბგერებით" ( ეს მოხსენება წაიკითხა აგრეთვე 1943 წელს ჰოსპიტალში და ფუნქციონალურ-ნერვულ დაავადებათა ინსტიტუტში). საქართველოში ლოგოპედიისა (პრაქტიკულ-თეორიული) და ქართული სურდოპედაგოგიკის დამაარსებელი, პედაგოგიურ მეცნიერებათა კანდიდატი.

წყარო: ქართველ მოღვაწეთა ლექსიკონი, 1801-1952: ტ. II ე-ლ / იოსებ იმედაშვილი.-თბ.,2021.-გვ.485

• სახელმძღვანელო ზეპირი და წერითი მეტყველების ნაკლოვანებათა გამოსასწორებლად (ავტორი). - თბილისი, ცოდნა, 1963. - 187გვ.
• ქართული ენა : სახელმძღვ. ყრუ-მუნჯთა სკოლის პირველი კლასისათვის (ავტორი). - თბილისი, ცოდნა, 1960. - 127გვ.
• არითმეტიკა : ყრუმუნჯთა სკოლის მოსამზადებელი და პირველი კლასებისათვის (ავტორი). - თბილისი, ცოდნა, 1960. - 153გვ.
• ანბანი : ყრუ-მუნჯთა სკოლისათვის (ავტორი). - თბილისი, ცოდნა, 1959. - 157გვ.
• ლოგოპედია (ავტორი). - თბილისი, ცოდნა, 1958. - 270გვ.
• სახელმძღვანელო მეტყველების ნაკლოვანებათა გამოსასწორებლად (ავტორი). - თბილისი, სახელგამი, 1954. - 189გვ.