პეტრე ჭელიძე

დაბადების ადგილი: ქ. ოზურგეთი.

დაამთავრა თბილისის საინჟინრო-სამშენებლო ინსტიტუტი ინჟინერ-ჰიდროტექნიკოსის სპეციალობით 1933 წელს.

1933 წელს მუშაობა დაიწყო ამიერკავკასიის ჰიდროენერგეტიკულ სამეცნიერო-საკვლევ ინსტიტუტში, ენერგეტიკისა და ჰიდრავლიკის სექტორში მეცნიერ-მუშაკად; შემდეგ დააწინაურეს სექტორის გამგის მოადგილედ; მონაწილეობდა თბილისის თბოელექტროცენტრალის მშენებლობაში ჯერ სამუშაოთა მწარმოებლად, შემდეგ მშენებლობის მთავარი ინჟინრის მოადგილედ; 1940 წლიდან მოღვაწეობდა საბჭოთა კავშირის ნავთობმრეწველობის სამინისტროს სისტემაში; იგი დაინიშნა ტრესტ "საქნავთის" სამონტაჟო უბნის უფროსად, შემდგომ ამავე ტრესტის სამმართველოს კაპიტალური მშენებლობის განყოფილების უფროსად; 1950 წელს საბჭოთა კავშირის უმაღლესი საბჭოს პრეზიდიუმის ბრძანებულებით მიენიჭა "ადმინისტრაციული სამსახურის სამთო დირექტორის" წოდება; 1950 წლიდან 40 წლის განმავლობაში მუშაობდა სოხუმის დახურული ატომური ქალაქის (შემდგომში სოხუმის ფიზიკო-ტექნიკურ ინსტიტუტი) მთავარ ინჟინრად; ეს ინსტიტუტი შეიქმნა 1945 წელს პირველი ატომური ბომბის შექმნისათვის "ურანის პრობლემების" გადასაწყვეტად; თავის მოღვაწეობის მანძილზე დაამუშავა მრავალი სამეცნიერო თემები; ასევე განახორციელა ალაზნის სარწყავი სისტემების და იჯევანის (სომხეთი) ჰიდროელექტროსადგურის გამოკვლევები და ღონისძიებები; არის გამოგონებების ავტორი; დიდი წვლილი აქვს შეტანილი ქალაქ თბილისის სტაბილური იზოტოპების სამეცნიერო-საკვლევი ინსტიტუტის მშენებლობასა და ფორმირებაში; მისი აქტიური მონაწილეობით გაფართოვდა სოხუმის ფიზიკო-ტექნიკური ინსტიტუტის მატერიალურ-ტექნიკური ბაზა, რამაც წარმატებით უზრუნველყო საბჭოთა კავშირის ატომური და კოსმოსური კვლევების განხორციელება; დაჯილდოებული იყო მრავალი მაღალი სამთავრობო ჯილდოებით.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 311-312

• აფხაზეთის დამსახურებული ინჟინერი
• საქართველოს დამსახურებული ინჟინერი