თამაზ ჯაფარაშვილი

დაბადების ადგილი: ქ. ხაშური.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი და მიენიჭა ინჟინერ-მშენებლის კვალიფიკაცია 1959 წელს.

1960-1963წწ. მუშაობდა სახელმწიფო საპროექტო ინსტიტუტ "საქსახპროექტში" სამოქალაქო ნაგებობათა პროექტების განყოფილებაში ინჟინერ კონსტრუქტორად; 1964 წელს სამუშაოდ გადავიდა საქართველოს სამინისტრო საწარმოო-სამშენებლო გაერთიანება "მთავართბილმშენი"-ს №7 სამშენებლო სამუშაოთა მწარმოებლად; 1965 წელს სამშენებლო გაერთიანება "მთავართბილმშენი"-ს ბაზაზე ჩამოყალიბდა სამშენებლო ტრესტი "მაღლივმშენი" და ის გადაიყვანეს ამ ტრესტის სამშენებლო სამმართველოში სამუშაოთა მწარმოებლად. აღნიშნული ტრესტის სისტემაში მუშაობდა 1970 წლამდე; 1970-1995წწ. მუშაობდა თბილისის საქალაქო საბჭოს აღმასკომის დაქვემდებარებაში არსებულ სამშენებლო-სამონტაჟო ტრესტ "ინჟმშენი"-ს სისტემაში ჯერ უფროს სამუშაოთა მწარმოებლად, შემდეგ სამშენებლო სამმართველოს მთავარ ინჟინრად; 1981 წელს დაინიშნა სამშენებლო სამმართველოს უფროსად; 1996-2004წწ. მუშაობდა საქართველოს რკინიგზის სამმართველოს დაქვემდებარებაში არსებულ სამშენებლო-სამონტაჟო ტრესტ "გზამშენი"-ს ქ. ხაშურის სამშენებლო-სამონტაჟო სამმართველოს მთავარ ინჟინრად; მისი უშუალო მონაწილეობითა და ხელმძღვანელობით განხორციელებულ იქნა მრავალსართულიანი საცხოვრებელი სახლების მშენებლობა ქ. თბილისის საბურთალოსა და დიდუბის რაიონებში, მონაწილეობდა სასტუმრო "ივერიის" მშენებლობაში; მისი ხელმძღვანელობით შესრულებულ იქნა ნაპირსამაგრი სამუშაოები საქართველოს რკინიგზის შავიზღვისპირა მონაკვეთზე, ასევე ლისის ტბის საბაგირო გზის მშენებლობა; მრავალწლიანი პროფესიული საქმიანობისა და დამსახურებისათვის მიღებული აქვს სამთავრობო და საუწყებო ჯილდოები, ასევე საპატიო სიგელები და წოდებები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 338-339