ანდრო მაჭარაშვილი

დაბადების ადგილი: სოფელი კორბოული, საჩხერის მუნიციპალიტეტი.

დაამთავრა თბილისის სახელმწიფო უნივერსიტეტის ისტორიის ფაკულტეტი 1949 წელს.

მუშაობა დაიწყო საჩხერის მუნიციპალიტეტის სოფ. კორბოულის საშუალო სკოლაში სასწავლო ნაწილის გამგედ; ახალგაზრდა მასწავლებლის მუშაობა მარტო პედაგოგიური საქმიანობით როდი შემოიფარგლებოდა. იგი მხარში ამოუდგა სასოფლო საბჭოს აქტივს და აქტიურად ჩაება სოფლების კეთილმოწყობის საქმეში; მას სისტემატიურად ირჩევენ კორბოულის სასოფლო საბჭოს დეპუტატად, სასოფლო საბჭოს აღმასკომის წევრად, აღმასკომის თავმჯდომარის მოადგილედ; 1958 წლიდან გადაყვანილ იქნა კორბოულის ახლად გახსნილ №2 საშუალო სკოლის დირექტორად და წლების განმავლობაში უმწიკლოდ ემსახურებოდა მომავალი თაობის აღზრდის უაღრესად რთულ და საპატიო საქმეს; მუშაობდა სახალხო განათლებისა და კულტ-საგანმანათლებლო მუდმივი კომისიის თავმჯდომარედაც, სადაც სისტემატურად იხილებოდა საკითხები სასწავლო-აღმზრდელობითი მუშაობისა და მოსახლეობის კულტმომსახურების შესახებ; განსაკუთრებულ ყურადღებას უთმობდა კადრებთან მუშაობას, მასწავლებელთა დახელოვნებასა და აღზრდას; 1964 წელს ა. მაჭარაშვილის ინიციატივითა და სათანადო ორგანოების მხარდაჭერით სოფელ გორაძირში გაიხსნა დაწყებითი სკოლა, ხოლო, 1963 წელს - სოფელ ნიგვზარაში რვაწლიანი სკოლა; იყო ამხანაგური სასამართლოს თავმჯდომარე, საზოგადოება "ცოდნის" ლექტორი, პარტიის საჩხერის რაიკომის შტატგარეშე ინსტრუქტორი და პოლიტსკოლის პროპაგანდისტი; საზოგადოებასთან მჭიდრო ურთიერთობისა და მისი წარმატებული საქმიანობის შესახებ ხშირად წერდნენ პრესის ფურცლებზე (მაგ. "ყველასათვის მახლობელი ადამიანი", გაზეთი "ახალ ცხოვრება", 1967); კორბოულის №2 საშუალო სკოლის დირექტორად 1973 წლის 11 იანვრამდე მუშაობდა, ხოლო შემდეგ გადაყვანილ იქნა კორბოულის №1 საშუალო სკოლის დირექტორად, სადაც ასეთივე წარმატებით აგრძელებდა მუშაობას; 1989 წლის 2 ოქტომბერს საკუთარი განცხადების საფუძველზე გათავისუფლდა დირექტორის თანამდებობიდან პენსიაზე გასვლის გამო (მასწავლებლად დატოვებით); იგი 40 წელი მუშაობდა უწყვეტად საშუალო სკოლის ხელმძღვანელად, მათ შორის 31 წლის განმავლობაში დირექტორად, ხოლო 9 წელი სასწავლო ნაწილის გამგედ; 1991 წლის 20 სექტემბერს ატესტაციის შედეგად პირველი კატეგორიის პედაგოგის წოდება მიენიჭა. ანდრო მაჭარაშვილი საქართველოს დამსახურებული პედაგოგის ქრისტინე ხარშილაძის მეუღლე და მეცნიერ რევაზ მაჭარაშვილის მამაა.

• სკკპ (საბჭოთა კავშირის კომუნისტური პარტია), წევრი (1950-)