მერაბ ლორთქიფანიძე

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი ინჟინერ-ჰიდროტექნიკოსის კვალიფიკაციით 1967 წელს.

1966-1968წწ. მუშაობდა "თბილჰიდროპროექტში" ინჟინერ-ჰიდროტექნიკოსად; 1969-1971წწ. სწავლობდა საქართველოს ენერგეტიკისა და ენერგეტიკულ ნაგებობათა სამეცნიერო-კვლევითი ინსტიტუტის ასპირანტურაში; 1972-1978წწ. - ამავე ინსტიტუტის უმცროსი მეცნიერ-თანამშრომელი; 1978-2003წწ. - უფროსი მეცნიერ-თანამშრომელი; 2003 წლიდან - განყოფილების გამგე. მისი მოღვაწეობის სფერო მოიცავს ბეტონისა და რკინაბეტონის ფიზიკურ-მექანიკური თვისებების კვლევას. შეისწავლა ბეტონის შეზღუდული დეფორმაციის გავლენა მის სიმტკიცესა და დეფორმაციულობაზე, ბეტონის ცოცვადობის დეფორმაციის მიზეზები და მისი ბუნება. კვლევების საფუძველზე აღმოაჩინა, რომ ბეტონისა და სხვა მყარი კონსტრუქციული მასალების წრფივი ცოცვადობის დეფორმაცია მიმდინარეობს მხოლოდ ზედაპირულ აქტიურ გარემოში. ამ გარემოს მოცილების შემდეგ ცოცვადობა მთლიანად შექცევადია, რაც წარმოადგენს რებინდერის ეფექტის ახალ ფორმას. მიღებული აქვს მსუბუქი ბეტონის ახალი სახე - მსუბუქი პოლიმერლეჩობეტონი, რომელიც დანერგილია ენერგეტიკულ მშენებლობაში. მონაწილეობდა ენგურის თაღოვანი კაშხლის მშენებლობის პროცესში ბეტონის ხარისხის კონტროლის სამუშაოებში. წლების მანძილზე მოღვაწეობს საქართველოს ტექნიკურ უნივერსიტეტში, ბათუმის სახელმწიფო უნივერსიტეტში სრული პროფესორის თანამდებობაზე. გამოქვეყნებული აქვს მონოგრაფია და ორი სახელმძღვანელო, 53 სამეცნიერო ნაშრომი, ორი გამოგონება და პუბლიკაციები საერთაშორისო ჟურნალებში. მონაწილეობა აქვს მიღებული საერთაშორისო კონფერენციებში. 1999-2003წწ. იყო საერთაშორისო სამეცნიერო ტექნიკური ცენტრის საკოორდინატორო საბჭოში საქართველოს წარმომადგენელი. ტექნიკურ მეცნიერებათა კანდიდატი (1976), ტექნიკურ მეცნიერებათა დოქტორი (2001), პროფესორი (2003).

წყარო: საქართველოს ენერგეტიკოსები=Georgian Power Engineers: ენციკლოპედია.- თბილისი, 2016.- გვ.201

• საქართველოს ენერგეტიკის აკადემია, აკადემიკოსი

• ღირსების ორდენი