ალექსანდრე ბერაძე

დაბადების ადგილი: ქ. თბილისი.

დაამთავრა თბილისის გიმნაზია.

1924 წლის აჯანყების შემდეგ მამა და უფროსი ძმა, ქაქუცა ჩოლოყაშვილის თანამებრძოლი იოსები, დახვრიტეს. მომდევნო ძმა, სამხედრო პირი მიხეილი დაიკარგა, სამხედრო მფრინავი ვლადიმერი სამხედრო დავალების შემდეგ გაქრა, 19 წლის ალექსანდრე კი, რომელიც პროკლამაციებს ავრცელებდა, დააბეზღეს და უთვალთვალებდნენ, ამიტომ, დედის რჩევით, საზღვარგარეთ წავიდა. პარიზში ალექსანდრე ელექტრიკოსად მუშაობდა. 1930-იან წლებში უცხოურ ლეგიონში ჩაეწერა და აფრიკაში წავიდა. მიიღო კაპრალის ჩინი. დიმიტრი ამილახვართან ერთად იბრძოდა მაროკოში. 5 წლის შემდეგ დაბრუნდა პარიზში და ქარხანაში დაიწყო მუშაობა. მეორე მსოფლიო ომის დროს ქართულ ნაწილში "Unite Georgiens" ჩაწერეს. საფრანგეთმა კაპიტულაციის შემდეგ პარიზში დაბრუნდა და სამშობლოს გასათავისუფლებლად გერმანელთა შექმნილ ქართულ ბატალიონში გაერთიანდა. კავკასიაში გერმანელთა წარუმატებლობისა და უკანდახევის შემდეგ ალექსანდრე პარიზში დაბრუნდა. იბრძოდა იატაკქვეშა წინააღმდეგობა "რეზისტანტში". ომის შემდეგ სამოქალაქო ცხოვრებას დაუბრუნდა. გარდაიცვალა 1969 წელს კლამარში. ფრანგული უცხოური ლეგიონის ოფიცერი, წინააღმდეგობის მოძრაობა "რეზისტანსის" მონაწილე, ქართული ემიგრაციის წარმომადგენელი.

წყარო: ქართველი ემიგრანტები უცხოურ ლეგიონში / რუსუდან დაუშვილი // ქართული ემიგრაცია : სამეცნიერო ჟურნალი / გრიგოლ მაჩაბლის ფონდი; გრიგოლ რობაქიძის სახელობის უნივერსიტეტის ქართული ემიგრაციის ისტორიისა და გეოგრაფიის სამეცნიერო-კვლევითი ინსტიტუტი. - თბილისი, 2013. - N1 (4). - გვ.13 (dspace.nplg.gov.ge)