როზა გრიგორაშვილი

 დაბადების ადგილი: ქ. ზესტაფონი.

დაამთავრა თბილისის ევგენი მიქელაძის სახელობის ცენტრალური სამუსიკო სასწავლებელი (საგუნდო-სადირიჟორო და ვოკალური ); 2018 წელს თბილისის ვანო სარაჯიშვილის სახელობის კონსერვატორია (საშემსრულებლო ხელოვნების ბაკალავრი, აკადემიური გუნდის დირიჟორი); 2021 წელს ამავე კონსერვატორიის მაგისტრატურა (საშემსრულებლო ხელოვნების მაგისტრი, აკადემიური გუნდის დირიჟორი); 2018-2019 წლებში, Erasmus+ პროგრამით სწავლობდა გერმანიაში, ლიუბეკის მუსიკის აკადემიის მაგისტრატურაში, ეუფლებოდა სიმფონიურ დირიჟორობას, საეკლესიო მუსიკას, აკადემიური გუნდის დირიჟორობას (პროფესორ იოჰანეს კნეჰტის კლასი); 2020 წელს გაირა ჰარვარდის უნივერსიტეტის ონლაინ სასწავლო კურსი და მიიღო სერტიფიკატი "First Nights - Messiah"-თვის.

 2015-2018 წლებში მუშაობდა შპს "დეა"კერძო სკოლაში მუსიკის მასწავლებლად; აქვე დააარსა მოსწავლეთა აკადემიური გუნდი; მისი ხელმძღვანელობით გუნდმა მიიღო არაერთი ჯილდო, მათ შორის, საქართველოს ბავშვთა და ახალგაზრდული კოლექტივების საგუნდო მუსიკის II კონკურსზე ოქროს მედალი; ამავე პერიოდში იყო თბილისის სახელმწიფო კონსერვატორიის საოპერო სტუდიის გუნდის წევრი; გერმანული ეკლესიის გუნდის "გლორია" ქორმაისტერი (მთავარი დირიჟორი პროფესორი ნატალია ჩაგანავა); მღეროდა თბილისის გოგონათა გუნდში; 2019-2020 წლებში მოხალისეობრივი პროგრამით მოღვაწეობდა პოლონეთში, "Wertep-Festival"-სა და "A3" თეატრში; 2021 წლიდან ცხოვრობს გერმანიაში; მუშაობს ფრანკფურტში, სამუსიკო სკოლა Clavina-ში საგუნდო განყოფილების ხელმძღვანელად, სასწავლებელ Cluster-ში ვოკალის პედაგოგად და ოფენბახის სახელმწიფო სამუსიკო სკოლის პედაგოგად; მღერის შტუტგარტის ფილარმონიულ გუნდსა და ლიუბეკის მუსიკის აკადემიის გუნდში მიწვეულ სოპრანოდ; არის Frankfurter Singakademie-ს გუნდის წევრი; როგორც დირიჟორი და სოლო მომღერალი არის არაერთი ფესტივალის ნომინანტი და ლაურეატი: "Budapest Spring Festival", "Brahms Festival 2019" (გერმანია), "XV. Lubecker Adventssingen" - ჩრდილოეთ გერმანიის გუნდების ფესტივალი, "Wertep Festival" (პოლონეთი), "Sommer Festival 2022" (გერმანია), საერთაშორისო კონკურს-ფესტივალი "Renaissance" (სომხეთი), კლასიკური მუსიკის საერთაშორისო კონკურს-ფესტივალი "მომავლის ვარსკვლავები" (თბილისი), "საქართველოს ბავშვთა და ახალგაზრდული საგუნდო კოლექტივების ეროვნული კონკურსი"; მონაწილეობდა თბილისის საგუნდო მუსიკის საერთაშორისო ფესტივალში, გორის საგუნდო მუსიკის ფესტივალში, ფესტივალ "შემოდგომის თბილისში"; შესრულებული აქვს ქართველი და უცხოელი კომპოზიტორების ნაწარმოებები, მათ შორის: მოცარტის, ბრამსის, ვერდის, ფორეს რეკვიემები, კარლ ორფის Carmina Burana, ბახის საშობაო ორატორია, მოტეტები; მოცარტის, ჰაიდნის, პუჩინის მესები; გუნდები ოპერიდან "ფიგაროს ქორწინება", "კარმენი", "სიყვარულის ნექტარი", "ტრავიატა", "აბესალომ და ეთერი", "დაისი", "ალეკო", იოსებ კეჭაყმაძის, ბეგლარიშვილის, ხორავას და სხვათა საგუნდო ნაწარმოებები.