ნიკოლოზ ტერნიკოგოსოვი

ექიმი ნიკოლოზ ტერნიკოგოსოვი ცხოვრობდა და მოღვაწეობდა ფოთში, იგი საკუთარ სახლში იღებდა პაციენტებს და სამედიცინო დახმარებას უწევდა. ყველაზე საყურადღებოა მისი ანდერძი. ამონაწერი ქალაქის საბჭოს პრეზიდიუმის სხდომის ოქმიდან (1931 წლის 29 იანვარი). "ინფორმაციული მოხსენება ქ. ფოთის ნოტარიუსის ამხ. ლ. კუჭუხიძესი. ექიმ ტერნიკოგოსოვის გარდაცვალების დროს დატოვებული ანდერძის შესახებ. ხსენებული ტერნიკოგოსოვი, თანახმად მის მიერ დატოვებული ანდერძისა, მოძრავ ქონებას უანდერძებდა საკუთრებად მის მეუღლეს ანნას, ხოლო სახლს ხირურგიული ხელსაწყოებითა და სამედიცინო წიგნების ბიბლიოთეკას კი უანდერძებს მასვე მისი სიცოცხლეში მფლობელობის სახით და ცოლი მისი ანნას სიკვდილის შემდეგ კი უნდა დარჩენოდა ქალაქ ფოთის საბჭოს როგორც უძრავი, ისე მოძრავი ქონება. შენობაში კი უნდა მოწყობილიყო ტერნიკოგოსოვის სახელობის სამკურნალო ღარიბ ავადმყოფთათვის. ხირურგიული ინსტრუმენტები რჩებოდა ქალაქს ამავე საავადმყოფოსათვის. ანდერძის წარმოდგენის დროს, ქვრივმა ანნა ტერნიკოგოსოვამ განმიცხადა, რომ ის თხოულობს მოძრავ ქონებას მის სახელზე, თანახმად ანდერძისა, ხოლო რაც შეეხება სახლს, ქირურგიულ ხელსაწყოს, საექიმო წიგნების ბიბლიოთეკას და სამედიცინო ავეჯეულობას, ასეთებს ნებაყოფლობით ახლავე უთმობს და უარს აცხადებს ამ ქონების მფლობელობაზე. ხოლო თხოულობს, რომ მას ამავე სახლში დაეთმოს მის სიცოცხლეში საცხოვრებლად ორი პატარა ოთახი, რაც მისი სიკვდილის შემდეგ გადაეცემა საბჭოს, თანახმად ხსენებულ ნოტარიუსის წარმოდგენილი წერილობითი მოხსენებისა. როგორც სახლი, ისე მთელი ზემოხსენებული ინსტრუმენტები და ავეჯეულობა შეფასებულია დალუქული საერთო წესით." ნიკოლოზ ტერნიკოგოსოვმა ფოთს დაუტოვა საკუთარი სახლი, რომელიც  წარმოადგენს უნიკალურ არქიტექტურულ ნიმუშს, აგებულია არქიტექტორ ედმუნდ ფრიკის მიერ 1894 წელს. მისი ანდერძის თანახმად, სახლი უნდა გადასცემოდა ქალაქს მხოლოდ და მხოლოდ იმ ფუნქციით, რომ ემკურნალათ ღარიბი, ავადმყოფი ბავშვებისათვის. ნიკოლოზ ადამის ძე ტერნიკოგოსოვი კი მისივე სახლის ეზოშია დაკრძალული.

წყარო: გაზეთ "კვირის პალიტრის" ოფიციალურ ვებგვერდ: kvirispalitra.ge