ავთანდილ ჩირგაძე

დაბადების ადგილი: ქ. ქუთაისი.

დაამთავრა საქართველოს პოლიტექნიკური ინსტიტუტის ენერგეტიკის ფაკულტეტი ინჟინერ-ელექტრომექანიკოსის კვალიფიკაციით 1962 წელს.

მუშაობა დაიწყო თბილისის ელმავალმშენებელ ქარხანაში ოსტატად ელექტრული მანქანების საამქროში, შემდეგ საამქროს ინჟინრად, ინჟინერ-ტექნოლოგად, I კატეგორიის ინჟინერ-ტექნოლოგად, მთავარ სპეცილისტად ენერგეტიკის დარგში; 1976 წლიდან - "ელმავალმშენებლის" მთავარი ენერგეტიკოსი; 1989 წლიდან - მთავარი ტექნოლოგიური ბიუროს უფროსი. მისი თაოსნობით ქარხანაში შემუშავდა ენერგორესურსების დაზოგვის პროგრამა, გათვლილი 5 წელზე. ეს გამოცდილება გავრცელდა სხვა მსგავს ქარხნებში საკავშირო მასშტაბით. მარტო თბილისის "ელმავალმშენებელში" აღნიშნული პროგრამის განხორციელების შედეგად დაზოგილ იქნა არაერთი მილიონი კვტ. სთ ელეტროენერგია. მთავარმა ტექნოლოგიურმა ბიურომ მისი ხელმძღვანელობით გააფართოვა საქმიანობის არეალი და მოიპოვა ადგილობრივ და უცხოელ დამკვეთთა მყარი ნდობა, რამაც ქარხანა უფრო დიდ მასშტაბებზე, მათ შორის, ყოფილ საბჭოთა კავშირის საზღვრების გარეთაც გაიყვანა, შესაბამისი ეკონომიკური შედეგებით. მიღებული აქვს სახელმწიფო ჯილდოები.

წყარო: საქართველოს ენერგეტიკოსები=Georgian Power Engineers: ენციკლოპედია.- თბილისი, 2016.- გვ.380