გურამ ჩიტაშვილი

დაბადების ადგილი: ქ. გორი.

დაამთავრა მოსკოვის ბაუმანის სახელობის სახელმწიფო ტექნიკური უნივერსიტეტი 1960 წელს.

1960-1964წწ. მუშაობდა ქ. ლენინგრადში თბომავალმშენებელი ქარხნის საკონსტრუქტორო ბიუროში კონსტრუქტორად და ჯგუფის ხელმძღვანელად; 1965-1968წწ. სწავლობდა ლენინგრადის პოლიტექნიკური ინსტიტუტის ასპირანტურაში; 1968 წლიდან - ქ. რუსთავში საპროექტო ინსტიტუტ "საქგიპრომეზში" უფროსი ინჟინერი; 1969 წლიდან - საქართველოს პოლიტექნიკურ ინსტიტუტში "თბოენერგეტიკული დანადგარების" კათედრაზე ასისტენტი, დოცენტი; ტექნიკური უნივერსიტეტის "თბოტექნიკისა და თბოენერგეტიკული დანადგარების" კათედრის სრული პროფესორი; 1981-1986წწ. შეთავსებით მუშაობდა საქართველოს მეცნიერებათა აკადემიის პრეზიდიუმთან არსებული "ბუნებრივი რესურსების და საწარმოო ძალების შემსწავლელი კომისიის" ენერგეტიკის განყოფილებაში უფროსი მეცნიერ-თანამშრომლის თანამდებობაზე; მეცნიერებათა აკადემიასთან არსებული ენერგეტიკის პრობლემათა შემსწავლელი კომისიის წევრი; სამეცნიერო-ტექნიკურ ჟურნალ "ენერგიის" რედკოლეგიის წევრი; საქართველოს ენერგეტიკის ვეტერანთა კავშირის წევრი. მრავალი სამეცნიერო-ტექნიკური და სამეცნიერო-პრაქტიკული კონფერენციის მონაწილე; 140-ზე მეტი სამეცნიერო სტატიის, მეთოდური მითითების, სახელმძღვანელოსა და დამხმარე სახელმძღვანელოს ავტორი. მისი თანაავტორობით გამოცემულ სახელმძღვანელოს "ენერგეტიკული დანადგარები" მინიჭებული აქვს საქართველოს განათლების სამინისტროს რესპუბლიკური პრემია. მისი სტატიები გამოქვეყნებულია საქართველოსა და საზღვარგარეთის სამეცნიერო ჟურნალებში. სტატია "ორთქლის ტურბინა" შესულია ქართულ ენციკლოპედიაში. მისი სამეცნიერო ინტერესების სფეროა: თბოენერგეტიკა, თბოელექტროსადგურები, ორთქლტურბინული, აირტურბინული და ორთქლაირული დანადგარები, კოგენერაცია, ორფაზა ნაკადების თერმოგაზდინამიკა, თბომომარაგება. იყო სადისერტაციო საბჭოს წევრი, ხელმძღვანელობდა მაძიებლებს, მაგისტრანტებსა და დოქტორანტებს. ცნობილი მეცნიერი და აღიარებული სპეციალისტი თბოტექნიკისა და თბოენერგეტიკის დარგში, უმაღლესი სკოლის გამოცდილი და კვალიფიციური პედაგოგი, ტექნიკურ მეცნიერებათა კანდიდატი (1970), ტექნიკურ მეცნიერებათა დოქტორი (1995), პროფესორი.

წყარო: საქართველოს ენერგეტიკოსები=Georgian Power Engineers: ენციკლოპედია.- თბილისი, 2016.- გვ.381

• საერთაშორისო ინჟინერ-ენერგეტიკოსთა ასოციაცია (აშშ, ქ. ატლანტა), წევრი
• საქართველოს დამოუკიდებელ ინჟინერ-ენერგეტიკოსთა ასოციაცია, წევრი
• საქართველოს ენერგეტიკის აკადემია, აკადემიკოსი
• საქართველოს საინჟინრო აკადემია, აკადემიკოსი

• ორთქლის და აირის ტურბინები : თერმოდინამიკური ციკლები და ტურბინის საფეხურის თეორია : სახელმძღვ. ენერგეტ. ფაკ. სტუდ. (ავტორი). - თბილისი, ტექნ. უნ-ტი, 2005. - 164გვ. . - ISBN: 9992890177
• მრავალსაფეხურიანი ტურბინები : დამხმ. სახელმძღვ. (ავტორი). - თბილისი, ტექნ. უნ-ტის გამ-ბა, 1996. - 93გვ.
• ენერგეტიკული დანადგარები (თბოენერგეტიკული დანადგარები და თბომომარაგება) : სახელმძღვ. პოლიტექნ. ინ-ტის სტუდ. (თანაავტორი). - თბილისი, განათლება, 1987. - 447გვ.
• მეთოდური მითითებები ლაბორატორიული სამუშაოების შესასრულებლად თბურ ძრავებში (შემდგენელი). - თბილისი, საქ. პოლიტექნ. ინ-ტი, 1986. - 43გვ.
• თბური ძრავები (ავტორი) // ნაწ. 2. - თბილისი, 1984. - 79გვ.
• თბური ძრავები (ავტორი) // ნაწ. 1. - თბილისი, საქართველოს პოლიტექნ. ინ-ტი, 1981. - 54გვ.