თინა მეგრელიშვილი

დაბადების ადგილი: ქ. თბილისი.

დაამთავრა იაკობ ნიკოლაძის სამხატვრო სასწავლებელი 1949 წელს; კულტსაგანმანათლებლო სასწავლებელი 1951 წელს; თბილისის სახელმწიფო სამხატვრო აკადემიის სახვითი ხელოვნების ფაკულტეტი დაზგური ფერწერის განხრით 1957 წელს (პედაგოგები: შალვა მამალაძე, იოსებ გაბაშვილი, დავით წერეთელი, კონსტანტინე გრძელიშვილი, ვასილ  შუხაევი, კორნელი სანაძე, უჩა ჯაფარიძე, აპოლონ ქუთათელაძე.

მისი სადიპლომო ნამუშევარი იყო - "დაგვიანებული მგზავრები" (ხელმძღვანელი: უ. ჯაფარიძე); 1957 წლიდან მონაწილეობდა რესპუბლიკურ და საკავშირო გამოფენებში, იყო ჯგუფური გამოფენების მონაწილე: საბჭოთა ხელისუფლების დამყარების მე-40 წლისთავადმი მიძღვნილი რესპუბლიკური გამოფენა; საქართველოს ეროვნული გალერეა (თბილისი, 1957 ); კავკასიის ხალხთა შიდამრეწველობის გამოფენა (1958); თბილისის სახელმწიფო სამხატვრო აკადემიის 1957 წელს კურსდამთავრებულთა ერთობლივი გამოფენა; საქართველოს სსრ ხელოვნების მუშაკთა სახლი; საქართველოს სსრ  მხატვართა კავშირი (თბილისი, 1988); პერსონალური გამოფენა შ. დადიანის სახ. საქართველოს ხელოვნების მუშაკთა სახლი (თბილისი, 1989). ძირითადი ნამუშევრები: "ქალი წითელ სავარძელში", "ნარიყალას მიდამოები", MALLE TUDRE-ს პორტრეტი, "მარინას პორტრეტი", "რაჭა-ნიკორწმინდა", "ქალი ვიოლინოთი", "ძაღლი კერრი", "მეჩეთი ნარიყალასთან", "დიდი ცემი - წითელი ხიდი", "რაჭა-ჭიშკარი", "ყაყაჩოები", "ნატაშას პორტრეტი", "მეფე ერეკლე II-ის ფერისცვალების ეკლესია", "მუზა". 1957-1958 წლებში მუშაობდა ს. ჯანაშიას სახელობის საქართველოს სახელმწიფო ისტორიულ მუზეუმში ეთნოგრაფიის განყოფილებაში მხატვრად, ასრულებდა სამეცნიერო თემებთან დაკავშირებულ მხატვრულ ტაბულებს; შესრულებული აქვს სერია - "კავკასიაში მცხოვრებ ხალხთა ტიპები" ( ს. ჯანაშიას სახელობის საქართველოს ისტორიული მუზეუმის ექსპოზიციისთვის, 1958); 1962-1963 წლებში მუშაობდა "ქართული ფილმის" მულტფილმების სტუდიაში მხატვარ-დეკორატორად: "ქორბუდა", "ნახევარწიწილა"; 1964-1967 წლებში მუშაობდა ტექნიკური ესთეტიკის საკავშირო სამეცნიერო - კვლევითი ინსტიტუტის საქართველოს ფილიალის მსუბუქი მრეწველობისა და სუვენირების განყოფილებაში მხატვარ-ინსტრუქტორად; მისი ესკიზებით ქ. ცხაკაიას ხალიჩების ფაბრიკაში და თბილისის ბაგების ხალიჩების ფაბრიკაში იქსოვებოდა ხალიჩები და სუფრები შუა აზიის ქვეყნების დაკვეთით; 1974-1989 წლებში მუშაობდა პროფკავშირების კულტურის სასახლეში ხატვის პედაგოგად, ხატვა-ფერწერის წრის ხელმძღვანელად. მხატვარ თენგიზ სოსელიას მეუღლე.

• საქართველოს მხატვართა კავშირი, წევრი