ილია ფერაძე

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის ენერგეტიკის ფაკულტეტი ავტომატიკა-ტელემექენიკის სპეციალობით 1962 წელა.

1962 წელს მუშაობა დაიწყო საქართველოს მეცნიერებათა აკადემიის კიბერნეტიკის ინსტიტუტში - უმცროს მეცნიერ თანამშრომლად; 1966–1972წწ. ჩააბარა ასპირანტურაში და მუშაობდა მეცნიერებათა აკადემიის ელექტრონიკის ინსტიტუტში ინჟინრად; 1972 წლიდან მუშაობდა კვების მრეწველობის სამინისტროს მართვის ავტომატიზებული სისტემების სპეციალურ საკონსტრუქტორო ბიუროში: ჯერ განყოფილების გამგედ, 1975 წლიდან დირექტორის მოადგილედ სამეცნიერო დარგში; 1981-2000წწ. მუშაობდა საქტელერადიოკომიტეტში, ახლადაარსებული საინფორმაციო გამოთვლითი ცენტრის დირექტორად; 1984 წელს იგი ხელმძღვანელობდა ცნობილი მოგზაურის და მეცნიერის ტიმ სევერინის არგონავტების დახვედრის საზღვაო ოპერაციებს; 1992 წელს დააარსა სარეკლამო კომპანია "ტვ+" და გაიმარჯვა მსოფლიო ბანკის მიერ გამოცხადებულ პირველ სარეკლამო ტენდერში; 1997-2000წწ. წარმატებით თანამშრომლობდა მსოფლიოს უდიდეს ფირმებთან, როგორებიცაა: Proctor&Gamble, Ferrero, Baltica, Wrigley, Cadbury, Cofe Pele და სხვა; 1972 წლიდან, წლების მანძილზე, იყო  აფროსნობის ფედერაციის პასუხისმგებელი მდივანი; 2001 წლიდან ი. ფერაძე ეწევა პედაგოგიურ საქმიანობას; ლექციებს კითხულობდა სხვადასხვა უნივერსიტეტებში - მარკეტინგულ კომუნიკაციებში და რეკლამის ისტორიაში; 2002 წელს საქართველოს კათოლიკოს-პატრიარქის ილია II  ლოცვა-კურთხევით დააარსა წმ. გრიგოლ ფერაძის საზოგადოება, საზოგადოებამ წმ. გრიგოლის სახელის უკვდავსაყოფად საქართველოს სხვადასხვა ქალაქებში ჩაატარა მრავალი ადგილობრივი და საერთაშორისო ღონისძიება. მისი აქტიური მონაწილეობით, ბაკურციხეში წმინდანის დაბადების ადგილას, წმ. გიორგის ეკლესიის ეზოში, მშობლების სახლის ნანგრევებზე, აშენდა წნიმდანის სახლ-მუზეუმი, რომელიც აღიჭურვა საინტერესო ექსპოზიციით. 2017 წ ი. ფერაძე დაჯილდოებულია ვარშავის უნივერსიტეტის წმ. გრიგოლ ფერაძის საპატიო ორდენით (2017). არის  რამდენიმე მონოგრაფიის ავტორი. პედაგოგისა და საზოგადო მოღვაწის ბიძინა ფერაძისა და თინა ჟორჟოლიანის (საქართველოს დამსახურებული ბიბლიოთეკარი) შვილი, მსახიობ გია ფერაძის ძმა.

• საერთაშორისო სარეკლამო ასოციაცია, წევრი (2002-)

• 2002 - ღირსების ორდენი
  საქართველოში აფროსნობის განვითარებაში შეტანილი წვლილისთვის
• 1971 - სსრკ სპორტის ოსტატი (აფროსნობაში)

• აფრები თბილისის ზღვაზე : თვითმხილველის მოგონებები (ავტორი). - თბილისი, ფავორიტი პრინტი, 2023. - 94გვ.
• წმინდა მღვდელმოწამე გრიგოლ ფერაძე : ცხოვრება და კვალი ნათელი (ავტორი). - თბილისი, 2020. - 58გვ.
• მე, ბებია-ბაბუა, დედა, მამა და გია ფერაძე (ავტორი). - თბილისი, ინტელექტი, 2014. - 270გვ.. - ISBN: 9789941454707
• სევდის კრებული 2 / გია ფერაძე (წინასიტყ. ავტორი). - თბილისი, ინტელექტი, 2014. - 228გვ.. - ISBN: 9789941454714
• მარკეტინგული კომუნიკაციები (ავტორი) // წ. 1, რეკლამის ისტორია. - თბილისი, 2010. - 414გვ.. - ISBN: 9789941027147