თამაზ კობახიძე

დაბადების ადგილი: ქ. თბილისი.

დაამთავრა საქართველოს ზოოტექნიკურ-სავეტერინარო ინსტიტუტი 1956 წელს.

1956–1957წწ. იყო ცხაკაიას (ახლანდელი სენაკი) მეფრინველეობის ფაბრიკის საამქროს უფროსი; 1958–1960წწ. თბილისის მეფრინველეობის ფაბრიკის მთავარი ვეტექიმი; 1960–1971წწ. საქართველოს ზოოტექნიკურ-სავეტერინარო სასწავლო-კვლევითი ინსტიტუტის თანამშრომელი; 1971–1973წწ. ამავე ინსტიტუტის ქიმია-ბიოლოგიური პრეპარატების ექსპერიმენტული ქარხნის დირექტორის მოადგილე, 1974 წლიდან – დირექტორი. მისი ხელმძღვანელობით საქართველოში პირველად შემუშავდა ახალი საკვები პრეპარატი, რომელსაც მეფრინველეობაში იყენებდნენ. მანვე შეისწავლა და წარმოებაში დანერგა ახალი ფოსფორორგანული ნაერთებისაგან წარმოქმნილი ინსექტიციდური პრეპარატი "ხლოფო-50" (იყენებდნენ მავნებლების, კარტოფილის ნარგავებში – კოლორადოს ხოჭოს, აგრეთვე ყურძნის ჭიის წინააღმდეგ); შეიმუშავა სხვადასხვა წარმოების ნარჩენების საკვებად გამოყენების ტექნოლოგიები და მეცხოველეობის პრაქტიკაში მათი დანერგვის მეთოდები.  ავტორია სამეცნიერო ნაშრომების, 7 გამოგონების და 25 რაციონალური წინადადებისა. მიღებული აქვს სახელმწიფო ჯილდოები. ვეტერინარიის მეცნიერებათა კანდიდატი (1969). ვეტერინარი ექიმი.

წყარო: საქართველოს მეცნიერებათა ეროვნული  აკადემია: ქართული ენციკლოპედიის ი. აბაშიძის სახელობის მთავარი სამეცნიერო რედაქცია: georgianencyclopedia.ge; საქართველო: ენციკლოპედია: ტ.5. -თბ.,2023. -გვ. 98

• 1998 - ღირსების ორდენი
• 1981 - საქართველოს სახელმწიფო პრემია

• "ЭЗЗВН-1" საკვები პრეპარატი ბროილერის წიწილებისათვის (თანაავტორი). - თბილისი, 1981. - 6გვ.
• მეთოდური მითითებანი შინაურ ფრინველთა პასტერელოზის (ხოლერა) და ვიბროიზულ ენტეროჰეპატიტთან ბრძოლის შესახებ (ავტორი). - თბილისი, 1974. - 25გვ.
• მეთოდური მითითებანი შინაურ ფრინველთა პულოროზის და ტიფთან ბრძოლის შესახებ (ავტორი). - თბილისი, 1971. - 23გვ.