ამირან სალუქაშვილი

დაბადების ადგილი: ქ. თბილისი.

1938 წლიდან ქორეოგრაფიულ ხელოვნებას ეუფლებოდა თბილისის პლეხანოვის სახ. კლუბთან არსებულ ქართული ცეკვის ანსამბლში.

ქართულ ცეკვაში მისი პირველი პედაგოგი იყო მ. ბახტაძე. 1944-1948 წლებში საქართველოს შრომითი რეზერვების კულტურის სახლთან არსებულ სიმღერისა და ცეკვის თვითმოქმედ ანსამბლშია (ლოტბარი ს. იაშვილი, ქორეოგრაფი მ. ბახტაძე). 1949-1951 წლებში ა. სალუქაშვილი სოხუმის ქართული საესტრადო ანსამბლის მოცეკვავე-მსახიობია (ხელმძღვანელი ჯ. ბაგრატიონი). 1952-1970 წლებში მუშაობდა საქართველოს ხალხური ცეკვის სახელმწიფო აკადემიურ ანსამბლში მოცეკვავე-მსახიობად ი. სუხიშვილისა და ნ. რამიშვილის ხელმძღვანელობით. ანსამბლთან ერთად მოიარა მსოფლიოს 50-ზე მეტი ქვეყანა. 1953 წელს ქ. ბუქარესტში გამართულ მსოფლიო ახალგაზრდობის IV ფესტივალში მონაწილეობდა აკადემიურ ანსამბლთან ერთად და დაჯილდოვდა ლაურეატის წოდებით. ა. სალუქაშვილის შემოქმედება, როგორც მოცეკვავე-სოლისტისა გამოირჩეოდა დახვეწილი ტექნიკით, სცენურობითა და მაღალი პროფესიონალიზმით. აღსანიშნავია მისი სოლო პარტიები: "მხედრული", "შეჯიბრი", "ხევსურული სიუიტა", "ლელო" და სხვა. სალუქაშვილი წლების მანძილზე ნაყოფიერ მუშაობას ეწეოდა თბილისის მერიასთან არსებულ ი. სუხიშვილის სახ. ქართული ცეკვის სახელმწიფო სკოლა-სტუდიაში.

წყარო: 2007 წლის საიუბილეო თარიღები: თეატრი, მუსიკა, კინო, ქორეოგრაფია.- თბ., 2007.- გვ.62; ქართული ხალხური ქორეოგრაფიის მოღვაწენი / გიორგი სუხიშვილი.-თბ.,1988.გვ.104-105

• 1963 - საქართველოს დამსახურებული არტისტი