ნოდარ შოშიაშვილი

დაბადების ადგილი: ქ. გორი.

დაამთავრა თბილისის სახელმწიფო უნივერსიტეტის ისტორიის ფაკულტიტეტი საქართველოს ისტორიის სპეციალობით 1946 წელს; ასპირანტურა საქართველოს ისტორიის სპეციალობით.

1951-1958წწ. მუშაობდა სიმონ ჯანაშიას სახელობის საქართველოს სახელმწიფო მუზეუმში შუა საუკუნეების მატერიალური კულტურის ისტორიის განყოფილების ჯერ უმცროს, შემდეგ კი უფროს მეცნიერ-თანამშრომლად; 1954 წლიდან ეწეოდა პედაგოგიურ საქმიანობას, კითხულობდა ლექციებს თბილისის პედაგოგიურ ინსტიტუტში; 1958-1972წწ. წლებში მოღვაწეობდა კორნელი კეკელიძის სახელობის ხელნაწერთა ინსტიტუტში შემდეგ პოზიციებზე: ისტორიული დოკუმენტებისა და არქივების განყოფილების ხელმძღვანელი (1960-1963), პალეოგრაფიის განყოფილების ხელმძღვანელი (1963-1968), დიპლომატიკის განყოფილების ხელმძღვანელი (1968-1972); 1972 წლიდან გარდაცვალებამდე მუშაობდა თბილისის სახელმწიფო უნივერსიტეტის საქართველოს ისტორიის კათედრაზე. იყო ჯერ დოცენტი (1972), ხოლო 1992 წლიდან პროფესორი; კითხულობდა ლექციებს ისტორიისა და აღმოსავლეთმცოდნეობის ფაკულტეტზე. მისი სპეცკურსები იყო: საქართველოს ისტორია, საქართველოს ისტორიის წყაროთმცოდნეობა, ქართული ისტორიოგრაფია, ქართული დიპლომატიკა და პალეოგრაფია, ანტიკური ხანის ქართულ სახელმწიფოთა და შუა საუკუნეების საქართველოს სახელმწიფო წყობილება, ქართული ფეოდალური საგვარეულობის ისტორია. ნ. შოშიაშვილი აქტიურად თანამშრომლობდა ქართულ ენციკლოპედიასთან, იყო ენციკლოპედიის საქართველოს ისტორიის სექციის გამგე. ენციკლოპედიაში გამოქვეყნებული აქვს სტატიები შუა საუკუნეების ქართულ გვარებზე, ისტორიულ პირებზე, ბაგრატიონთა დინასტიაზე, ეპიგრაფიკაზე, ქართული დამწერლობის განვითარებაზე და სხვა. მრავალი სამეცნიერო სტატიისა და მონოგრაფიის ავტორი.

საკანდიდატო დისერტაციის თემა - "რკონის დაწერილი, როგორც საისტორიო წყარო", დაიცვა 1953 წელს.

• აბუსერისძე ტბელი, 800 : კრებული (ავტორი) // აბუსერიძეთა სახლი XI-XVI საუკუნეებში. - თბილისი, 1999. - 104გვ.
• ქართლის ცხოვრება / ტექსტის ადაპტაცია ეკუთვნით მანანა სანაძეს, ნოდარ შოშიაშვილს // წ.2. - თბილისი, ნეკერი, 1998. - 208გვ.
• ქართლის ცხოვრება : "ძველი ქართლის ცხოვრება" / გამოსაცემად მოამზადეს, წინასიტყვ. და ტერმინთა განმარტება დაურთეს ილია ანთელავამ და ნოდარ შოშიაშვილმა (შემდგენელი). - თბილისი, ნიკე, 1996. - 560გვ.
• ქართლის ცხოვრება (შემდგენელი) // ტ. 1. - თბილისი, ნეკერი, 1994. - 168გვ.
• საქართველოს სახელმწიფო დროშები და გერბები (თანაავტორი). - თბილისი, მერანი, 1990. - 38გვ.
• ქართული ისტორიული საბუთები IX-XIII სს. (შემდგენელი). - თბილისი, მეცნიერება, 1984. - 419გვ.
• ქართული წარწერების კორპუსი, ლაპიდარული წარწერები (შემდგენელი) // ტ. 1 : აღმოსავლეთ და სამხრეთ საქართველო (V-X სს.) / შეადგინა და გამოსაცემად მოამზადა ნ. შოშიაშვილმა. - თბილისი, 1980. - 360გვ.
• ვარძია : გზამკვლევი (თანაავტორი). - თბილისი, საქ. სსრ მეცნ. აკად. გამ-ბა და სტ., 1955. - 117გვ.