ჯეირან გოგინავა

დაბადების ადგილი: ქ. წყალტუბო.

ქორეოგრაფიულ ხელოვნებას ეზიარა წყალტუბოს პიონერთა სახლის თვითმოქმედ ცეკვის ანსამბლში ვალერიან ბრეგვაძის ხელმძღვანელობით. 1961-1962 წლებში ცეკვავდა ქ. თბილისის ძერჟინსკის სახელობის კლუბთან არსებულ ანსამბლ "მხედრულში" (ხელმძღვანელები გრიგოლ და ჰამლეტ კობეშავიძეები). 1962-1963 წლებში იყო თბილისის ტრამვაი-ტროლეიბუსების სამმართველოს თვითმოქმედი ქორეოგრაფიული ანსამბლის სოლისტი-მოცეკვავე (ხელმძღვანელი ბ. დარახველიძე). 1964 წლიდან ჯ. გოგინავა საქართველოს ხალხური ცეკვის სახელმწიფო დამსახურებული აკადემიური ანსამბლის სოლისტია. მის ცეკვებიდან აღსანიშნავია მთიულური ცეკვები და კინტოური "ძველი თბილისის სურათებიდან". 1991 წელს ჩამოაყალიბა ცეკვის პროფესიონალური ანსამბლი "სიონი", რომელიც წარმატებით გამოდიოდა როგორც საქართველოში, ისე მის საზღვრებს გარეთ. 1992 წელს "სიონი" სხვადახსვა დროს იმყოფებოდა თურქეთის ქალაქების: არხავისა და სტამბოლის მსოფლიოს ხალხთა ცეკვების ფესტივალებზე, სადაც ანსამბლმა უმაღლესი ჯილდო - "გრან-პრი" დაიმსახურა. 1994 წელს ჯეირან გოგინავა მიიწვიეს საქართველოს თავდაცვის სამინისტროსთან არსებულ ფოლკლორულ ანსამბლ "მამულის" დირექტორად. ანსამბლმა ორჯერ იმოგზაურა ესპანეთში მსოფლიო ხალხთა ცეკვების ფესტივალზე და "გრან პრით" დაჯილდოვდა. 2000 წლიდან დაინიშნა იმერეთ-რაჭა-ლეჩხუმ-ქვემო სვანეთის რეგიონალური გამგეობის თავმჯდომარის მოადგილედ, შემდგომ თავმჯდომარედ.

წყარო: ქართული ხალხური ქორეოგრაფიის მოღვაწენი/ გიორგი სუხიშვილი.-თბ.,1988.-გვ.188; წყალტუბო, წარსული, აწმყო და მომავალი: facebook.com

• 2016 - წყალტუბოს საპატიო მოქალაქე
• 1981 - საქართველოს დამსახურებული არტისტი
• ქორეოგრაფიის რაინდის ორდენი
• ქართული კულტურის ამაგდარის ოქროს მედალი
• ღირსების ორდენი