ალექსანდრე მაღლაკელიძე

დაბადების ადგილი: ქ. ზუგდიდი.

სწავლობდა ხონის ვაჟთა გიმნაზიაში და ქუთაისის I გიმნაზიაში, რომელიც დაასრულა 1920 წელს. უმაღლესი განათლება მიიღო თბილისში. 1921-1924 წლებში სწავლობდა აკაკი ფაღავას ხელმძღვანელობით არსებულ დრამატულ სტუდიაში.

სცენაზე პირველად გამოვიდა 1921 წელს მიხეილ ქორელის მიერ დადგმულ სპექტაკლში "სიყვარულის ძალა". შემდეგ  ოთხი სეზონი (1922-1926 წლები) რუსთაველის თეატრში მუშაობდა, 1926-1928 წლებში ბათუმის სახელმწიფო თეატრში, 1928-1931 წლებში კოტე მარჯანიშვილის სახელობის სახელმწიფო აკადემიურ თეატრში. 1937 წლიდან იყო თელავის სახელმწიფო თეატრის სამხატვრო ნაწილის გამგე და რეჟისორი. შესრულებული აქვს შემდეგი როლები: ჯაკომო - "ბეატრიჩე ჩენჩი", ფრონდოზო - "ცხვრის წყარო", ირინარხი - "კაკალ გულში" და სხვ. 1928 წლის ზაფხულში საქართველო შემოიარა პიესებით: "რღვევა", "ხანუმა" და სხვ. 1932 წელს ურალში მისი ხელმძღვანელობით დაიდგა "რღვევა", 1937 წელს თელავში "ცხვრის წყარო", "კაცია-ადამიანი?!" და "ნაცარქექია". განათლებით და პროფესიით ქვანახშირის მაღაროების ინჟინერი იყო, "დურუჯის" კორპორაციის წევრი.

წყარო: ქართველ მოღვაწეთა ლექსიკონი, 1801-1952: ტ. III მ-რ / იოსებ იმედაშვილი.-თბ.,2021.-გვ.85

• საქართველოს ხელოვნების მუშაკთა კავშირი, წევრი (1921-)