დიმიტრი ერისთავი

დაბადების ადგილი: სოფელი გორაბერეჟოული, ჩოხატაურის მუნიციპალიტეტი.

დაამთავრა კიევის უნივერსიტეტის სამედიცინო ფაკულტეტი 1884 წელს.

1888 წლიდან მუშაობას იწყებს ექიმად ოზურგეთის რაიონის სოფელ ნაგომარში, შემდეგ, 1900 წელს გადადის ოზურგეთის მაზრის ექიმად, 1913 წელს რაჭის სამაზროს ექიმად, 1919 წელს შორაპნის სამაზრო ექიმად; იგი, საქართველოში პირველი ექიმია, ვინც თავის სოფელში, საკუთარ სახლში გახსნა ქირურგიული სტაციონარი, ხოლო ოზურგეთში - საქალაქო აფთიაქი; უანგაროდ ებრძოდა ქოლერის ეპიდემიას (1892 და 1908 წლებში); დ. ერისთავი ცნობილია როგორც საუკეთესო მთხრობელი. მისი პირველი მოთხრობა "უბედური ქმარი" 1887 წელს დაიბეჭდა "ივერიაში"; მისი მოთხრობები (1901 წლამდე) ჟურნალ "მოამბეშიც" იბეჭდებოდა. იგი ცნობილია როგორც კარგი პოეტი და მთარგმნელი (თარგმნა ა. პუშკინის, მ. ლერმონტოვის, ვ. ჟუკოვსკის, ა. პლეშჩევის, ა. ნეკრასოვის, ფ. ვოლტერისა და სხვათა ცალკეული ნაწარმოებები). ქართველი ექიმი, ჯანდაცვის ორგანიზატორი, ბელეტრისტი, ნოველისტი, ქველმოქმედი.

წყარო: საქართველოს სამედიცინო კალენდარი: ნაწ.I / ჯუმბერ ქორჩილავა.-თბ.,2010.-გვ.41-42