ქრისტიანა ლეკრეკი-ბერიშვილი

ქრისტიანა ლეკრეკი ეროვნებით ქართველი არ ყოფილა, მაგრამ მას შემდეგ, რაც ემიგრანტ მამია ბერიშვილზე დაქორწინდა, მისი საქმიანობა საქართველოს დემოკრატიული რესპუბლიკის მთავრობის მიერ შეძენილი ლევილის მამულის მოვლა-პატრონობა გახდა და ქართველ ემიგრანტთა იმედად იქცა. მეორე მსოფლიო ომის დროს ტყვედჩავარდნილი მამია ბერიშვილი - ნოე რამიშვილის დისშვილი, 1943 წელს საქართველოს დემოკრატიული რესპუბლიკის მთავრობის მეთაურის, ნოე ჟორდანიასა და საფრანგეთში საქართველოს დემოკრატიული რესპუბლიკის ელჩის, აკაკი ჩხენკელის შუამავლობით გაათავისუფლეს, რის შემდეგაც, საფრანგეთის ქართულ ემიგრაციას შეუერთდა. ქართველთა საფლავების მოვლა-პატრონობის გარდა, ქრისტიანა ლეკრეკი ლევილის შატოს გალამაზებაზეც ზრუნავდა - მის გარშემო ვარდები გააშენა და სიცოცხლის ბოლომდე უძღვებოდა ასოციაციის "ქართული კერა" ადმინისტრაციულ საქმიანობას. 

წყარო: ქართველი ქალები ემიგრაციაში/ტექსტის ავტორი რ. დაუშვილი. -თბ., 2024. -გვ.111-113

• ასოციაცია "ქართული კერა", წევრი