დიმიტრი გრიგორაშვილი

დაამთავრა საქართველოს პილიტექნიკური ინსტიტუტის ელექტროტექნიკური ფაკულტეტი 1951 წელს.

1950-1957წწ. იყო ამიერკავკასიის რკინიგზის სამსახურში ტექნიკური განყოფილების ხელმძღვანელი; 1957 წლიდან – საქართველოს მეცნიერებათა აკადემიის მართვის სისტემების ინსტიტუტში წამყვანი ინჟინერი, განყოფილების ხელმძღვანელი, სამეცნიერო ნაწილში ინსტიტუტის დირექტორის მოადგილე; 2008 წლიდან - უფროსი მეცნიერ-თანამშრომელი. 1996 წელს დაიცვა დისერტაცია და მოიპოვა ტექნიკის მეცნიერებათა კანდიდატის ხარისხი. მისი სამეცნიერო თემატიკის ძირითადი მიმართულება იყო რეალურ დროში რთული დინამიკური ობიექტებისათვის, მათ შორის საფრენი აპარატებისათვის ციფრული სამართი სისტემების დამუშავება და შექმნა. 1958-1961წწ. მისი პროექტითა და უშუალო ხელმძღვანელობით, ინსტიტუტში აიგო ციფრული გამომთვლელი მანქანა "დელისი", რომელიც პირველი იყო საქართველოში და მრავალი წლის განმავლობაში გამოიყენებოდა მნიშვნელოვანი სამეცნიერო კვლევებისთვის. 1970-1974წწ. მისი ხელმძღვანელობით, აკადემიკოს ს. ილიუშინის თვითმფრინავთმშენებლობის საკონსტრუქტორო ბიუროსთან ერთად, დამუშავდა და შეიქმნა პირველი ანალოგურ-ციფრული გამომთვლელი კომპლექსი თვითმფრინავის ტრენაჟორის სტენდის სისტემაში სამუშაოდ. 1975-1978წწ. აკადემიკოს ანტონოვის თვითმფრინავთმშენებლობის საკონსტრუქტორო ბიუროსათვის მისი პროექტით შეიქმნა სპეციალიზებული ცგმ "ТАБЛИЦА", რომელიც გამოიყენებოდა ასაგები თვითმფრინავის აეროდინამიკური მახასიათებლების გაანგარიშებისთვის. ბოლო წლებში იგი ინტენსიურად მუშაობდა კომპიუტერით რთული დინამიკური ობიექტების მოდელირების საკითხებზე. მის მიერ შესრულებული სამუშაოები შეფასდა, როგორც ინოვაციური და მაღალი დონის სამუშაო. აქვეყნებდა სამეცნიერო სტატიებს.

წყარო: საქართველო ინფორმატიზაციის სათავეებთან/იდეის ავტორები: ივ. გორგიძე, ალ. გრიგოლიშვილი, ნ. იაშვილი; სარედაქციო კოლეგია: ა. ფრანგიშვილი, ბ. აბდუშელიშვილი, მ. ახობაძე [და სხვ.]. -თბ., 2017.-გვ.256-257

• 1982 - საქართველოს დამსახურებული ინჟინერი