ჯიმშერ კერესელიძე

დაბადების ადგილი: სოფელი შარდომეთი, ონის რაიონი.

დაამთავრა დიდი ჯიხაიშის სასოფლო-სამეურნეო ტექნიკუმი; საქართველოს სასოფლო-სამეურნეო ინსტიტუტის აგრონომიული ფაკულტეტი.

1963 წელს დაიწყო მუშაობა თბილისის ბოტანიკურ ბაღში და განვლო სამსახურეობრივი იერარქია მებაღიდან დაწყებული დირექტორობამდე: 1963 წ. მებაღე; 1964-1974წწ. საფინანსო-ეკონომიკური განყოფილება; 1974-1976წწ. მეცნიერ-თანამშრომელი; 1976-1977წწ. ბაღის გაფორმების სექტორის გამგე; 1977-1987წწ. ბოტანიკური ბაღის დირექტორის მოადგილე სამეურნეო დარგში; 1987-1997წწ. დირექტორის მოადგილე სამეცნიერო მიმართულებით; 1997-2000წწ. ბოტანიკური ბაღის დირექტორის მოვალეობის შემსრულებელი; 2000-2006წწ. ბოტანიკური ბაღის დირექტორი; 2006-2016წწ. ჯიმშერ კერესელიძე მუშაობდა ბოტანიკურ ბაღში სხვადასხვა წამყვან თანამდებობებზე. ქვეყნისათვის მძიმე 90-იან წლებში მან მნიშვნელოვანი წვლილი შეიტანა ბოტანიკური ბაღის გადარჩენის საქმეში; მისი ხელმძღვანელობის პერიოდში განახლდა ბაღის ინფრასტრუქტურა, შეუფერხებლად მიმდინარეობდა სამეცნიერო-კვლევითი საქმიანობა, მოხერხდა მცენარეთა კოლექციების შენარჩუნება და განახლება, დამყარდა კავშირები ევროპის წამყვან ბოტანიკურ ბაღებთან; ხელმძღვანელობდა არაერთ საერთაშორისო საველე ექსპედიციას და სამეცნიერო კონფერენციას. მისი თაოსნობით 1999 წელს დაარსდა საქართველოს ბოტანიკური ბაღებისა და პარკების ასოციაცია, რომელსაც იგი სიცოცხლის ბოლომდე უშუალოდ ხელმძღვანელობდა. მძიმე ეკონომიკური კრიზისის დროს ასოციაციამ მნიშვნელოვანი დახმარება გაუწია საქართველოს ბოტანიკურ ბაღებს. გამოქვეყნებული აქვს 100-მდე სამეცნიერო შრომა, მათ შორის 6 მონოგრაფია. სოფლის მეურნეობის მეცნიერებათა დოქტორი (1997).

წყარო: ჩვენი რაჭა / ირაკლი დვალი.-თბ.,2008.-გვ.204-205; საქართველოს ეროვნული ბოტანიკური ბაღი: facebook.com; ჯიმშერ კერესელიძე : გახსენება // საქართველოს რესპუბლიკა.-თბილისი, 2020.-9 ოქტომბერი.- N128 (9054).-გვ.11

• სოფლის მეურნეობის მეცნიერებათა აკადემია, აკადემიკოსი

• ღირსების ორდენი

• ადოლფ ქრისტიან როლოვი და თბილისის ბოტანიკური ბაღ (თანაავტორი). - თბილისი, დედა ენა, 2001. - 140გვ.. - ISBN: 9992889993