ლევან ხარატიშვილი

დაბადების ადგილი: ქ. გორი.

დაამთავრა თბილისის სახელმწიფო უნივერსიტეტის აგრონომიული ფაკულტეტი; თბილისის ენერგეტიკის ინსტიტუტის მექანიკის ფაკულტეტი საქარხნო-საფაბრიკო ინჟინერ-მექანიკოსის დიპლომით 1932 წელს.

მუშაობა დაიწყო გორის მანქანატრაქტორების საექსპლუატაციო სამსახურის განყოფილების გამგედ. 1960 წელს დანიშნეს გორის საქალაქო საბჭოს აღმასკომის თავმჯდომარედ. ამ თანამდებობაზე მისი მუშაობის პერიოდში აშენდა მოზრდილთა პოლიკლინიკა, ბავშვთა საავადმყოფო, ქალაქს შეეცვალა იერი, მოწესრიგდა ტრანსპორტის სამსახური და სხვა. 1963 წლიდან იყო საწარმოო პროცესების ავტომატიზაციის გორის სამეცნიერო-კვლევითი ინსტიტუტის დირექტორი. მრავალი წლის განმავლობაში ხელმძღვანელობდა ამ ერთ-ერთ დიდ და ურთულეს ორგანიზაციას. მისი ხელმძღვანელობით ინსტიტუტმა მნიშვნელოვან წარმატებებს მიაღწია: შეიქმნა მაღალი ეკონომიკური ეფექტურობის მქონე ათეულობით ავტომატური კონტროლის ხელსაწყო, დაპროექტდა და წარმოებაში დაინერგა მრავალი მართვის ავტომატიზებული სისტემა, გაიზარდა სამუშაოთა არეალი, საფუძველი ჩაეყარა ცალკეული ობიექტების ავტომატური მართვის ახალ ტექნოლოგიებს და პრინციპებს, გაუმჯობესდა თანამშრომელთა საყოფაცხოერებო პირობები, მტკიცე კავშირი დამკვიდრდა ხელსაწყოთმშენებელ ქარხანასთან. "ავტომატმრეწვის" წარმოებაში დანერგა რამდენიმე მნიშვნელოვანი გამოგონება. სიცოცხლის ბოლო წლებამდე განაგრძობდა მუშაობას უფროსი მეცნიერ-მუშაკის თანამდებობაზე. თავისი ცოდნა და გამოცდილება გამოიყენა ჩაის მრეწველობის სრულყოფისათვის. მას დიდი წვლილი მიუძღვის მწვანე ჩაის ფიქსაციის ურთულესი პროცესის ტექნოლოგიური ციკლის ავტომატიზებული მართვის სისტემაში ინფრაწითელი სხივების გამოყენებასა და ამით ქართული ჩაის ხარისხის ამაღლებაში. იყო მრავალი მნიშვნელოვანი ნოვაციის ავტორი. 

წყარო: საქართველო ინფორმატიზაციის სათავეებთან/იდეის ავტორები: ივ. გორგიძე, ალ. გრიგოლიშვილი, ნ. იაშვილი; სარედაქციო კოლეგია: ა. ფრანგიშვილი, ბ. აბდუშელიშვილი, მ. ახობაძე [და სხვ.]. -თბ., 2017.-გვ.318-319