ირაკლი მინაშვილი

დაბადების ადგილი: ქ. თბილისი.

დაამთავრა თბილისის სახელმწიფო უნივერსიტის ფიზიკის ფაკულტეტი 1979 წელს.

იმავე წლიდან მუშაობა დაიწყო თბილისის სახელმწიფო უნივერსიტის მაღალი ენერგიების ფიზიკის ინსტიტუტში; 1980–1995წწ. მონაწილეობდა ქ. დუბნის ბირთვული კვლევების გაერთიანებული ინსტიტუტისა და ქ. პროტვინოში (ორივე რფ) მდებარე 76-გიგაევიან პროტონულ სინქროტრონულ ამაჩქარებელზე ჩატარებულ ექსპერიმენტებში; 1995 წლიდან თანამშრომლობს მსოფლიოს წამყვან ინსტიტუტებსა და უნივერსიტეტებთან (მ. შ.: DESY, გერმანია; INFN, იტალია; ათენის უნ-ტი; Blaise Pascal University, საფრანგეთი; CERN, ბირთვული კვლევების ევრ. ცენტრი, შვეიცარია);
მისი სამეცნიერო კვლევის ძირითადი სფეროა ელემენტარული ნაწილაკების ფიზიკა, მათი დეტექტირების მეთოდები და დანადგარები; მან მნიშვნელოვანი წვლილი შეიტანა ელექტრომაგნიტური და ადრონული კალორიმეტრების პროექტირებასა და შექმნაში; 1995 წლიდან მუშაობს დეტექტორ "ატლასის" შექმნის პროგრამაში, ცერნის დიდ ადრონულ ამაჩქარებელზე; 2007 წლიდან არის ამ დეტექტორის ადრონული ტაილ-კალორიმეტრის მომსახურებისა და ინფრასტრუქტურის კოორდინატორი; "ატლასის" ექსპერიმენტში ხელმძღვანელობს საქართველოს კლასტერს; 2015 წელს მიღებული აქვს ATLAS-ექსპერიმენტის ჯილდო გამორჩეული მიღწევებისთვის (ნაშრომი "დაბალი ძაბვის წყაროების სტაბილურ ფუნქციონირებასა და ადრონული კალორიმეტრის დეტექტორზე არსებული ელექტრონიკის დახვეწა"); გამოქვეყნებული აქვს ნაშრომები მსოფლიოს წამყვან სამეცნიერო ჟურნალებში. მაღალი ენერგიების ბირთვული ფიზიკის სპეციალისტი, ფიზიკა-მათემატიკის მეცნიერებათა დოქტორი (1994). 

წყარო: საქართველოს მეცნიერებათა ეროვნული  აკადემია: ქართული ენციკლოპედიის ი. აბაშიძის სახელობის მთავარი სამეცნიერო რედაქცია: georgianencyclopedia.ge

• 2010 - საქართველოს ეროვნული პრემია (ფიზიკა–მათემატიკის დარგში)