მარიამი

XVIII საუკუნის მოღვაწე ვინმე მარიამს გადაუწერია საერო-მხატვრული ლიტერატურის ძეგლები–თეიმურაზ პირველის თხზულებანი "იოსებზილიხანიანი", "ლეილმაჯნუნიანი", "ვარდბულბულიანი", "შამფარვანიანი" და სხვ. ხელნაწერის ერთ-ერთ გვერდზე მინაწერია: "კარი პირველი. ლეილმაჯნუნისა ამბავი სპარსულისაგან ქართულად ნათარგმანები ღვთივ გვირგვინოსანისა მეფის თეიმურაზისაგან და ლექსადცა მისგანვე თქმული. სუფევითმცა ყოს უფალმან უკუნისამდე შეწევნა შენი. უფალი თანა ეყოს მწერალსა მარიამს, ამინ." ძველი ქართველი მწიგნობარი ქალები მეტწილად სასულიერო-საეკლესიო შინაარსის ძეგლების გადაწერით კმაყოფილდებოდნენ. მარიამ მწერალმა კი სამიჯნურო-სატრფიალო თემატიკის გადაწერით  საერო ძეგლების გავრცელებაში თავისი წვლილი შეიტანა. მწიგნობარი.

წყარო: ძველი ქართველი მწიგნობარი ქალები /იზოლდა ქაფიაშვილი.-თბ.,1994.-გვ.119-120