ხიმური რუხაია

დაბადების ადგილი: ქ. მარტვილი.

დაამთავრა თბილისის სახელმწიფო უნივერსიტეტის მექანიკა-მათემატიკის ფაკულტეტი მათემატიკოსის კვალიფიკაციით  1968 წელს.

1968 წლიდან მუშაობდა ილია ვეკუას სახელობის გამოყენებითი მათემატიკის ინსტიტუტში სხვადასხვა სამეცნიერო თანამდებობაზე, მათ შორის გამოყენებითი ლოგიკისა და პროგრამირების ლაბორატორიის ხელმძღვანელად და მათემატიკური ლოგიკისა და მეთოდოლოგიის განყოფილების გამგედ. 1974-1975 წლებში სამეცნიერო სტაჟირება გაიარა ვარშავის უნივერსიტეტის მათემატიკის ინსტიტუტში. მისი სამეცნიერო კვლევის ინტერესთა სფერო იყო კლასიკური და კომპიუტერული ლოგიკა. სამეცნიერო და საორგანიზაციო საქმიანობათა პარალელურად, 1976 წლიდან ეწეოდა პედაგოგიურ მუშაობას ივანე ჯავახიშვილის სახელობის თბილისის სახელმწიფო უნივერსიტეტში, ხოლო 1985 წლიდან სოხუმის სახელმწიფო უნივერსიტეტში, სადაც 2006 წლიდან იყო ასოცირებული პროფესორი. თბილისისა და სოხუმის სახელმწიფო უნივერსიტეტებში მისი ხელმძღვანელობით შვიდმა დოქტორანტმა წარმატებით დაიცვა დოქტორის ხარისხი. მონაწილეობდა როგორც ადგილობრივ, ასევე საერთაშორისო კონფერენციებში. მისი ორგანიზებით საქართველოში ჩატარდა მრავალი სამეცნიერო კონფერენცია, სიმპოზიუმი და სეზონური სკოლა, მათ შორის აღსანიშნავია საკავშირო კონფერენციები მათემატიკურ ლოგიკაში და ყოველწლიური საერთაშორისო სიმპოზიუმი "ენა, ლოგიკა და გამოთვლები", რომელიც 1995 წლიდან რეგულარულად იმართება ამ დარგების არაერთი ცნობილი მეცნიერის მონაწილეობით. გამოქვეყნებული აქვს 100-მდე სამეცნიერო სტატია და ხუთი სახელმძღვანელო, ავტორია ექვსი გამოგონების. მათემატიკის აკადემიური დოქტორი (2006), პროფესორი (2006).

სადისერტაციო თემა - "შემამოკლებელი სიმბოლოების სისტემის შესახებ", დაიცვა ლენინგრადის სახელმწიფო უნივერსიტეტში 1980 წელს. 

წყარო: საქართველოს მათემატიკოსთა კავშირის ვებგვერდი: gmu.gtu.ge

• ლოგიკა : სალექციო კურსი (ავტორი). - თბილისი, საქ. უნ-ტის გამ-ბა, 2004. - 2004გვ.. - ISBN: 9789994050734
• პარამეტრებიანი ამოცანები მათემატიკის ტესტებისათვის : არითმეტიკა, ალგებრა და ანალიზის საწყისები (თანაავტორი). - თბილისი, ინტელექტი, 2004. - 32გვ.. - ISBN: 9994022393
• მოდელირება წინადადებათა ლოგიკის ენაზე : მეთოდ. მითით. უნ-ტის სტუდ. (ავტორი). - თბილისი, თბილ. უნ-ტის გამ-ბა, 2000. - 44გვ.
• მეცნიერებათა დამსახურებული მოღვაწის პროფესორ შალვა ფხაკაძის დაბადებიდან 80 წლისთავის საიუბილეოდ მიძღვნილი გამოცემა = This publication is dedicated to the memory of honoured scientist prof. Sh. Pkhakadze (თანაავტორი). - თბილისი, ინტელექტი, 1999. - 51გვ.