ადა ნემსაძე

დაბადების ადგილი: ქ. თერჯოლა.

დაამთავრა თბილისის სახელმწიფო უნივერსიტეტის ფილოლოგიის ფაკულტეტი 1997 წელს; საქართველოს მეცნიერებათა აკადემიის შოთა რუსთაველის სახელობის ქართული ლიტერატურის ინსტიტუტის ასპირანტურა 2005 წელს.

2009 წლიდან თბილისის სახელმწიფო უნივერსიტეტის შოთა რუსთაველის სახელობის ქართული ლიტერატურის ინსტიტუტის უფროსი მეცნიერ თანამშრომელი; 2016-2017წწ. პარალელურად მუშაობდა თბილისის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტის ხარისხის მართვის სამსახურის უფროსი სპეციალისტად; 2017 წლიდან არის ამავე ფაკულტეტის მიწვეული ლექტორი; მისი კვლევის სფეროა XX-XXI ს. ქართული მწერლობა, როგორც მოდერნისტული, ისე საბჭოთა და პოსტსაბჭოთა პერიოდები; იგი იკვლევს XX ს. II ნახევრის ქართული პროზის ხასიათს, ნიშნებს, თავისებურებებს. მისი განსაკუთრებული ინტერესის სფეროა ო. ჭილაძის მემკვიდრეობის შესწავლა. მონოგრაფიაში "იდენტიფიკაციის პრობლემა ოთარ ჭილაძის რომანებში" (2009); აღნიშნული პრობლემა გამოკვლეულია ამერიკის მეცნიერის, ე. ერიკსონის, იდენტობის ნეოფსიქოანალიტიკური თეორიის საფუძველზე, წარმოჩენილია იდენტობის სხვადასხვა სახეთა (ეროვნული, სოციალური, ფსიქოსოციალური, რელიგიური) მხატვრული გააზრების თავისებურებანი; მან გამოსცა წიგნი "ორი საუკუნე თანამედროვე ლიტერატურაზე", რომელშიც შევიდა ო. ჭილაძის მხატვრული სისტემის კვლევის, ცალკეულ კონცეპტთა და სახეთა ანალიზის ამსახველი ახალი ნაშრომები (2020); აღნიშნულ გამოცემაში დაიბეჭდა სტატიები თანამედროვე ქართველ ავტორთა შესახებ და შსს-ს არქივში ჩატარებული კვლევის შედეგები, რომელმაც წარმოაჩინა მოდერნისტული პერიოდის ნაკლებად ცნობილი რამდენიმე ავტორი; ასევე იკვლევს მიმდინარე ლიტერატურულ პროცესებს, თანამედროვე ქართული პროზის თემატიკას, ნოვაციებსა და ტრადიციებს, ენობრივ და სტილურ თავისებურებებს, მის მიმართებას მსოფლიო სალიტერატურო პროცესთან; აღნიშნული კვლევის შედეგები გამოქვეყნდა მის ფრანგულენოვან ნაშრომში "La prose géorgienne moderne" (2025); თანაავტორია კრებულებისა: "XX საუკუნის ქართული ლიტერატურა" (ნაწ. I, III, IV; 2016, 2021, 2025);  "ბოლშევიზმი და ქართული ლიტერატურა" (წიგ. I, II; 2016, 2018); არის რამდენიმე მონოგრაფიისა და კრებულის რედაქტორი, ჟურნალ "აფინაჟის" (2020-2021), "სტუდენტური კვლევების" (2020-დან) და "კრიტიკის" (2020-დან) სარედაქციო საბჭოების წევრი. ფილოლოგიურ მეცნიერებათა კანდიდატი (2006), ფილოლოგიის დოქტორი (2007).

წყარო: თბილისის სახელმწიფო უნივერსიტეტი: encyclopedia.tsu.ge

• თბილისის სახელმწიფო უნივერსიტეტის წარმომადგენლობითი საბჭო (სენატი), წევრი (2016-)
• კომპარატივისტული ლიტერატურის ქართული ასოციაცია (GCLA), წევრი (2022-)

• ორი საუკუნე : თანამედროვე ლიტერატურაზე (ავტორი). - თბილისი, მერიდიანი, 2022. - 452გვ.. - ISBN: 9789941341403
• ცხოვრება ორ სამყაროში : გრიგოლ რობაქიძე : მონოგრაფია (რედაქტორი). - თბილისი, არტანუჯი, 2021. - 448გვ.. - ISBN: 9789941494864
• იდენტიფიკაციის პრობლემა ოთარ ჭილაძის რომანებში (ავტორი). - თბილისი, მწიგნობარი, 2009. - 130გვ.. - ISBN: 9789941907913