გურამ აბრამიშვილი

დაბადების ადგილი: ქ. ხაშური.

დაამთავრა თბილისის სახელმწიფო უნივერსიტეტის ისტორიის ფაკულტეტი 1952 წელს.

1953-1962წწ. იყო თბილისის სამხატვრო აკადემიის პროფესორი, შ. ამირანაშვილის სახელობის საქართველოს ხელოვნების სახელმწიფო მუზეუმის ფოტოთეკის გამგე. 1969-1974წწ. თბილისის სახელმწიფო უნივერსიტეტის ხელოვნების ისტორიისა და თეორიის კათედრის პედაგოგი. დოცენტი (1974-1994), პროფესორი (1994-2002). სხვადსახვა დროს თბილისის სახელმწიფო უნივერსიტეტში მიჰყადა კურსები: "შუა საუკუნეების ქართული ჭედური ხელოვნება" და "მუზეუმცოდნეობა". 1962-2002წწ. იყო მუზეუმის საგანძურის განყოფილების გამგე. მის სახელს უკავშირდება საქართველოში ეროვნული იკონოგრაფიის წარმოშობა-განვითარების პრობლემატიკის საგანგებო კვლევა. მან მონოგრაფიულად შეისწავლა წმ. დავით გარეჯელის ცხოვრების ამსახველი ციკლის შემცველი ძეგლები ძველ ქართულ სახვით ხელოვნებაში. წვლილი მიუძღვის ატენის სიონის კვლევის საქმეში. მონაწილეობდა საქართველოს მეცნიერებათა აკადემიის პრეზიდიუმთან არსებულ საქართველოს ისტორიის წყაროების კომისიის ექსპედიციებში, რომლის მუშაობის შედეგად გამოიცა ფრესკული წარწერების I ტომი (1989). მისი ინიციატივით დაინერგა საქართველოში ძნელად გასარჩევი ფრესკული წარწერებისა და ამა თუ იმ კომპოზიციის ულტრაიისფერი და ინფრაწითელი დასხივებით გამოვლენა და ფოტოგრაფირება. მისი ხელმძღვანელობით შესაძლებელი გახდა უძველესი ტიხრული მინანქრის დაკარგული ტექნოლ. პროცესების აღდგენა. დიდი წვლილი შეიტანა ქართული ლითონმქანდაკებლობის შესწავლისა და პოპულარიზაციის საქმეში. იგი იყო ჟენევაში (1979), ვენაში (1981), ბელგრადსა (1981) და პარიზში (1982) გამართული ქართული ჭედური ხელოვნების ძეგლების გამოფენათა კატალოგების ერთ-ერთი ავტორი. განსაკუთრებული წვლილი მიუძღვის საქართველოში სამუზეუმო საქმის განვითარებაში. იყო შ. ამირანაშვილის სახელობის ხელოვნების მუზეუმის საგანძურის განყოფილების ხელმძღვანელი რამდენიმე წლის განმავლობაში. ქართული ხელოვნების ისტორიის, საქართველოს ისტორიის, წყაროთმცოდნეობის, არქეოლოგიის, პალეოგრაფიის მკვლევარი. ხელოვნებათმცოდნეობის კანდიდატი (1966), ხელოვნებათმცოდნეობის დოქტორი (1993). 

წყარო: თბილისის სახელმწიფო უნივერსიტეტი: encyclopedia.tsu.ge

• საქართველოს მხატვართა კავშირი, წევრი (1981-)

• 2000 - ღირსების ორდენი
• 1971 - საქართველოს კულტურის დამსახურებული მუშაკი

• ატენის სიონი : ნარკვევი ჯვრის ტიპის ერთი ხუროთმოძღვრული ძეგლის ისტორიიდან (ავტორი). - თბილისი, ნეკერი, 2012. - 218გვ.. - ISBN: 9789941436499
• გორიჯვარი (თანაავტორი). - გორი, 1994. - 80გვ.
• ხახულის კარედი = Хахульский триптих = The Khakhuli triptych = Le triptyque de Chachouli = Das triptychon von Chachuli : ალბომი (ავტორი). - თბილისი, ხელოვნება, 1988. - 144გვ.
• სტეფანოზ მამფალის ფრესკული წარწერა ატენის სიონში (ავტორი). - თბილისი, მეცნიერება, 1977. - 70გვ.
• დავით გარეჯელის ციკლი ქართულ კედლის მხატვრობაში (ავტორი). - თბილისი, ხელოვნება, 1972. - 178გვ.