კუკური თავართქილაძე

დაბადების ადგილი: სოფელი ვაკიჯვარი, ოზურგეთის რაიონი.

დაამთავრა თბილისის სახელმწიფო უნივერსიტეტის ფიზიკის ფაკულტეტი ატომური ენერგიის სპეციალობით 1955 წელს.

1956-1971წწ. მუშაობდა ამიერკავკასიის ჰიდრომეტეოროლოგიურ სამეცნიერო-კვლევით ინსტიტუტში კლიმატოლოგიის გნყოფილებაში; 1965 წელს იმავე ინსტიტუტში ჩამოაყალიბა რადიაციუი გამოკვლევების სექტორი, რომელსაც ხელმძღვანელობდა; 1971-2009წწ. - ვახუშტი ბაგრატიონის გეოგრაფიის ინსტიტუტი, უფროსი მეცნიერ თანამშრომელი; კლიმატის ცვლილების ლაბორატორიის გამგე; კლიმატოლოგიისა და ბუნებრივი პროცესების მათემატიკური მოდელირების განყოფილების გამგე; 1979 წელს ჩამოაყალიბა და ხელმძღვანელობდა კლიმატის ცვალებადობის შემსწავლელ ლაბორატორიას, რომელიც შემდეგში ბუნებრივი პროცესების მოდელირების ლაბორატორიად გარდაიქმნა. ლაბორატორიასთან ერთად ფუნქციონირებს აჭარის ატმოსფეროს გაჭუჭყიანებაზე დისტანციური, ოპტიკური მეთოდების დაკვირვების სტაციონალური ბაზა ზღვისმიერი და კონტინენტური წარმოშობის ატმოსფერული აეროზოლების თვისებების შესასწავლად. მისი კვლევის ობიექტს შეადგენს ატმოსფეროს ფიზიკის (მეტეოროლოგიის) ზოგიერთი პრობლემა - რადიაციული კლიმატოლოგიის, ატმოსფეროს გაჭუჭყიანების, თავისუფალი ატმოსფეროს სტრატიფიკაციისა და ატმოსფეროს ოპტიკის საკითხები. შექმნა ხელსაწყოები: "ნიადაგის ზედაპირის და სიღრმეების თერმოელექტრული თვითმწერი", "ატმოსფეროს გამჭვირვალობის ნომოგრამა" (შეტანილია უმაღლესი სასწავლებლების პროგრამებში). ერთ-ერთმა პირველმა შექმნა ატმოსფეროს გაჭუჭყიანების განსაზღვრის დისტანციური მეთოდი, ააგო ზღვისმიერი და კონტინტენტური წარმოშობის ატმოსფერული აეროზოლების ოპტიკურ-მეტეოროლოგიური მოდელი, რომელიც გამოყენებულია აშშ-ს, გერმანიის, ავსტრალიის, რუსეთის და სხვ. შესაბამის კვლევით ცენტრებში, ხელოვნური თანამგზავრებიდან კონტინენტური და ოკეანისეული ბუნებრივი რესურსების ძიებისა და შესწავლის პროცესში. გამოიკვლია თავისუფალი ატმოსფეროს თერმული სტრატიფიკაციის გავლენა სეტყვის წარმოქმნის პროცესზე. მუშაობს ატმოსფეროს გაჭუჭყიანების როლის დასადგენად, რადიაციული კლიმატის ჩამოყალიბებაზე. გამოქვეყნებული აქვს 167 ნაშრომი. 12 დაბეჭდილია საერთაშორისო იმპაკტ-ფაქტორის მქონე პერიოდულ გამოცემებში, 38 საქართველოს მეცნიერებათა აკადემიის მოამბეში, 14 საერთაშორისო კონფერენციების და სიმპოზიუმების შრომათა კრებულებში (აშშ, კანადა, საფრანგეთი, ავსტრია, შვეიცარია, იაპონია, თურქეთი, რუსეთი), 17 ყოფილი საბჭოთა კავშირის საკავშირო კონფერენციების და სიმპოზიუმების შრომათა კრებულებში, დანარჩენი (მათ შორის 6 მონოგრაფია) რესპუბლიკურ გამოცემებში. მიღებული აქვს ამერიკის ღირსების მედალი (2002). ფიზიკა-მათემატიკის მეცნიერებათა დოქტორი.

საკანდიდატო დისერტაციის თემა - "ამიერკავკასიის მთიან პირობებში ეფექტური გამოსხივების გამოთვლის შესახებ", დაიცვა 1965 წელს; სადოქტორო დისერტაციის თემა - "რადიაციის აეროზოლური შესუსტების მოდელირება და ატმოსფეროს გაჭუჭყიანების განსაზღვრის მეთოდები", დაიცვა 1985 წელს.

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.131-132; ვახუშტი ბაგრატიონის სახელობის გეოგრაფიის ინსტიტუტი: geography.tsu.ge

• აშშ-ს ბიბლიოგრაფიული ინსტიტუტის სამეცნიერო საბჭო, უცხოელი წევრი (2005-)
• საკავშირო მეცნიერებათა აკადემიის რადიაციის შემსწავლელი მუდმივმოქმედი კომისია, წევრი (1980-1991)

• საქართველოს ეროვნული პრემია
  საქართველოს ჰავის ცვლილებების ამსახველი სამეცნიერო შრომათა ციკლისათვის

• ჰავის თანამედროვე ცვლილება საქართველოში : რადიაციული რეჟიმის ცვალებადობა (ავტორი). - თბილისი, მეცნიერება, 1999. - 150გვ.
• საქართველოს მიწისპირა ტემპერატურული ველის ცვლილების ემპირიული მოდელი (თანაავტორი). - თბილისი, ჰიდრომეტეოროლოგიის ინსტიტუტი, 1999. - 128გვ.