ტიციან ტაბიძე

დაბადების ადგილი: სოფელი ჭყვიში, ახლანდელი ვანის რაიონი.

დაიბადა მღვდლის ოჯახში. 1905 წლიდან სწავლობდა ქუთაისის კლასიკურ გიმნაზიაში. მისი ნოველები, მინიატურები და ლექსები უკვე 1911 წლიდან იბეჭდებოდა "კოლხიდაში", "სახალხო გაზეთში", "ერში", "თეატრი და ცხოვრებაში". 1911 წლიდან სწავლობდა მოსკოვის უნივერსიტეტის ფილოლოგიის ფაკულტეტზე. იყო ერთ-ერთი დამაარსებელი, ხელმძღვანელი და თეორეტიკოსი "ცისფერყანწელთა" სიმბოლისტური ორდენისა, ავტორი ცნობილი წერილისა — "ცისფერი ყანწებით". რედაქტორობდა გაზეთ "ბარიკადს". ლირიკულ ლექსებთან ერთად წერდა პოემებს, მინიატურებს, წერილებს, ესეებს, ლიტერატურულ ნარკვევებს, თარგმნიდა სხვადასხვა ქვეყნის პოეტთა ნაწარმოებებს. ტაბიძეს ეკუთვნის თარგმანები ფრანგული და რუსული ენებიდან. მან თარგმნა ა. პუშკინის, ი. ბუნინის, ვ. მაიაკოვსკის, ლ. არაგონისა და სხვათა თხზულებები. 1935 წელს მოსკოვში გამოიცა მისი პოეტური კრებული რუსულ ენაზე. ტიციანის ლექსები თარგმნილია ფრანგულ, ინგლისურ, პოლონურ, იტალიურ და სხვა ენებზე. 1937 წელს ანტისაბჭოთა მოღვაწეობის ბრალდებით დააპატიმრეს და დახვრიტეს. სხვა ვერსიით, გადასახლება მისჯილი პოეტი ციმბირის ტრამალზე ჩამოსვეს და თოვლიან ქარბუქში მიატოვეს. მისი საფლავი არ არსებობს.

წყარო: ქართული საბჭოთა ენციკლოპედია: ტ.9.-თბ.,1985.-გვ.635

• "ცისფერი ყანწები" - ქართველ სიმბოლისტ პოეტთა და პროზაიკოსთა შემოქმედებითი გაერთიანება, ერთ-ერთი დმფუძნებელი

• ლექსი მეწყერი : თხზულებანი (ავტორი). - თბილისი, საქ. ილია ჭავჭავაძის სახ. მწიგნობართა ასოციაცია, 2011. - 464 გვ. . - ISBN: 978-99928-62-59-9
• ახალი ქართული ლიტერატურა : მოკლე ნარკვევი (ავტორი). - თბილისი, უნ-ტის გამ-ბა, 2008. - 211 გვ.. - ISBN: 978-9941-13-047-2
• ერთტომეული : ლექსები, პოემები, პროზა, წერილები (ავტორი). - თბილისი, მერანი, 1995. - 464 გვ.
• ლექსები, პოემები, პროზა, წერილები (ავტორი). - თბილისი, მერანი, 1985. - 671 გვ.
• ლექსები, პოემები, თარგმანი (ავტორი). - თბილისი, სახელგამი, 1955. - 187 გვ.