ოტია იოსელიანი

დაბადების ადგილი: სოფელი გვიშტიბი, წყალტუბოს რაიონი.

დაამთავრა სსრკ მწერალთა კავშირთან არსებული უმაღლესი ლიტერატურის კურსები 1961 წელს.

თხზულებებეს აქვეყნებდა 1954 წლიდან; მოთხრობების პირველი კრებული "კარის მეზობლები" გამოსცა 1957 წელს; ნაყოფიერად მუშაობდა როგორც ნოველისტიკაში, ისე რომანის ჟანრში, წერდა პიესებსა და კინოსცენარებს; რომანებში ("ვარსკვლავთ ცვენა", 1962; "ტყვეთა ტყვე", "შავი და ცისფერი მდინარე", 1975) მთავარია ომის თემა; ავტორი ყურადღებას ამახვილებს ზნეობრივ-ეთიკურ პრობლემატიკაზეც (რომანი "იყო ერთი ქალი", 1970); ინტენსიურად მუშაობდა საბავშვო მწერლობის დარგში (კრებულები "ცხრა მთას იქით", 1969; "დაჩის ზღაპრები", 1973; "ცაგამთენია", 1973 და სხვ.); ავტორია ათამდე პიესისა, რომელთაგან რამდენიმე ("ადამიანი იბადება ერთხელ", "როცა სიყვარული მოვა", "სანამ ურემი გადაბრუნდება", "ექვსი შინაბერა და ერთი მამაკაცი") დაიდგა საქართველოს და საკავშირო თეატრების სცენაზე; ავტორია კინოსცენარების "ჩქარი მატარებელი", "მალე გაზაფხული მოვა", "თეთრი ქალიშვილი" და სხ.; ო. იოსელიანის ცალკეული თხზულებანი თარგმნილია მრავალ უცხო ენაზე.  2002 წელს გამოიცა მისი ახალი კრებული, რომელშიც 99 ლექსია შეტანილი.

წყარო: ქართული საბჭოთა ენციკლოპედია: ტ. 5.-თბ., 1980.-გვ.204; ეროვნული ფილმოგრაფიის პორტალი (დაარქივებული): web.archive.org; წიგნი ღირსებისა: ტ. 2/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2001. - გვ.41; პრემია "საგურამოს" ლაურეატები: 2003-2017 წლები/რედაქტორ-შემდგენლები: ანდრო ბედუკაძე, ლანა უნდილაშვილი.-საგურამო, 2017.-გვ.115; ქართველი პოეტები : ენციკლოპედია / შეადგინა ალექსანდრე ელერდაშვილმა.- თბ.,2021.- გვ.170-171

• საქართველოს კინემატოგრაფისტთა შემოქმედებითი კავშირი, წევრი

• 2010 - პრემია "საგურამო"
• 1997 - ღირსების ორდენი
• საპატიო ნიშნის ორდენი

• მუხლზე დაწერილი ბარათები (ავტორი). - თბილისი, საარი, 2005. - 288გვ.
• დაჩის ზღაპრები (ავტორი). - თბილისი, ბონდო მაცაბერიძის გამ-ბა, 2003. - 132გვ.
• ორი რომანი. პიესები (ავტორი). - თბილისი, საბჭ. საქართველო, 1982. - 645გვ.
• კარის მეზობლები : მოთხრობები ბავშვთათვის (ავტორი). - თბილისი, საბლიტგამი, 1957. - 124გვ.