კორნელი კეკელიძე

დაბადების ადგილი: სოფელი ტობანიერი, ვანის რაიონი.

დაამთავრა კიევის სასულიერო აკადემია 1904 წელს.

1905-1906 წლებში მასწავლებლობდა ქუთაისსა და თბილისში. მონაწილეობდა საეკლესიო მუზეუმის კომიტეტის, ქართველთა შორის წერა-კითხვის გამავრცელებელი საზოგადოებისა და საისტორიო-საეთნოგრაფიო საზოგადოების მუშაობაში. კორნელი კეკელიძე ერთ-ერთი მათგანია, ვინც გამოავლინა, შეისწავლა, გამოსცა და სამეცნიერო კვლევები მიუძღვნა ძველი ქართული ლიტერატურის უბრწყინვალეს ნიმუშებს. კეკელიძის პირველი სამეცნიერო ნაშრომი "ახალი საგალობლები აბო თბილელისა" 1905 ჟურნალ „მწყემსში“ (№ 13, 14) დაიბეჭდა. 1907 გადამუშავებული საკანდიდატო ნაშრომისათვის "ლიტურგიკული ქართული ძეგლები სამამულო წიგნსაცავებში და მათი მეცნიერული მნიშვნელობა" (რუსულ ენაზე, ცალკე წიგნად გამოიცა თბილისში, 1908) მიენიჭა მაგისტრის სამეცნიერო ხარისხი. დიდია მისი ღვაწლი თბილისის სახელმწიფო უნივერსიტეტის დაარსებაში. 1918 წლიდან გარდაცვალებამდე ხელმძღვანელობდა ძველი ქართული ლიტერატურის ისტორიის კათედრას. 1919-1925 სიბრძნისმეტყველების ფაკულტეტის დეკანი, ხოლო 1926-1930წწ. სასწავლო-სამეცნიერო ნაწილის პრორექტორი იყო. 1921—1930წწ. ხელმძღვანელობდა თსუ-თან არსებული სიძველეთსაცავს, 1933-1936წწ. ხელმძღვანელობდა ქუთაისის პედაგოგიური ინსტიტუტის ქართული ლიტერატურის ისტორიის კათედრას. 1942-1949წწ. განაგებდა რუსთაველის სახელობის ქართული ლიტერატურის ისტორიის ინსტიტუტს. 1948-1954წწ.  გამოქვეყნდა საქართველოს სახელმწიფო მუზეუმის ხელნაწერების აღწერილობათა რამდენიმე ტომის კ. კეკელიძის საერთო რედაქციით. განუზომელია კეკელიძის ღვაწლი ტექსტოლოგიაში: 1918 და 1946 წლებში გამოსცა ქართული ჰაგიოგრაფიული თხზულებების კიმენურ რედაქციათა ორტომეული. იგი იკვლევდა ქართულ-ბიზანტიურ, ქართულ-სპარსულ ლიტერატურის ურთიერთობებს, ძველი ქართული ლიტერატურისა და ხალხური სიტყვიერების ურთიერთმიმართების საკითხებს. კ. კეკელიძემ დიდი ამაგი დასდო ქართულ ისტორიოგრაფიასაც, აქვს საგანგებო გამოკვლევები ძველი ქართული დამწერლობის, ქართული წელთაღრივხვისა და კალენდრის, ძველი ქართული სტამბისა და ქართული წიგნის ბეჭდვის ისტორიის, ძველ ქართულ ლიტერატურაში მთარგმნელობითი მეთოდისა და სხვა დიდმნიშვნელოვანი საკითხების შესახებ.

წყარო: ქართული საბჭოთა ენციკლოპედია: ტ. 5.-თბ.,1980.-გვ.461; burusi.wordpress.com; buki.ge

• ამიერკავკასიის ცაკი, წევრი (1927-)
• განათლების სახალხო კომისარიატის კოლეგია, წევრი
• თბილისის სახელმწიფო უნივერსიტეტი, დამაარსებელი
• საქართველოს მეცნიერებათა აკადემია, აკადემიკოსი (1941-)
• საქართველოს მეცნიერებათა აკადემია, თანადამფუძნებელი

• 1943 - საქართველოს მეცნიერებათა დამსახურებული მოღვაწე
• შრომის წითელი დროშის ორდენი (2 ორდენი)
• ლენინის ორდენი

• ძველი ქართული ლიტერატურის ისტორია (V-XVIII სს.) : სახელმძღვ. უმაღლ. სკოლებისათვის (ავტორი). - თბილისი, თბილ. უნ-ტის გამ-ბა, 1987. - 496გვ.
• შოთა რუსთაველი და მისი ვეფხისტყაოსანი (ავტორი). - თბილისი, განათლება, 1979. - 147გვ.
• რუსთველოლოგიური ნარკვევები (ავტორი). - თბილისი, მერანი, 1971. - 317გვ.
• უცხო ავტორები ძველს ქართულს მწერლობაში (ავტორი) // "ტფილისის უნივერსიტეტი მოამბე", N VIII. - ტფილისი, 1930. - 99-202გვ.
• ხანმეტი და ჰაემეტი ტექსტები : ლიტ. მიმოხილვა (თანაავტორი) // "მიმომხილველი"-საქ. საისტორიო და საეთნოგრაფიო საზ-ბის ორგანო. - ტფილისი, 1926. - 261-267გვ.
• საკითხი სირიელ მოღვაწეთა ქართლში მოსვლის შესახებ (ავტორი). - ტფილისი, ტფ. უნივერსიტეტის გამოცემა, 1925. - 107გვ.