ფარნაოზ ერთელიშვილი

დაბადების ადგილი: ქ. თბილისი.

დაამთავრა თბილისის სახელმწიფო უნივერსიტეტის ფილოლოგიის ფაკულტეტი 1950 წელს.

მუშაობდა თბილისის სახელმწიფო უნივერსიტეტის ახალი ქართული ენის კათედრაზე. იყო ერთ-ერთი ინიციატორი თბილისის სახელმწიფო უნივერსიტეტში ტოპონიმიკური ცენტრის - ტოპონიმიკის ლაბორატორიის დაარსებისა. მას ეკუთვნის ნაშრომები (გამოქვეყნებული თუ გამოუქვეყნებელი) ენათმეცნიერების ისეთ დარგებში, როგორიცაა ფონეტიკა, მორფოლოგია, სინტაქსი, ეტიმოლოგია, ლექსიკოლოგია, მათ შორის აღსანიშნავია "რთული წინადადების ისტორიისათვის ქართულში" (1963); "ზმნური ფუძეების ფონემატური სტრუქტურისა და ისტორიის საკითხები ქართულში" (1970; გაანალიზებულია 5481 ფუძე); "სახელურ ფუძეთა ფონემატური სტრუქტურისა და ისტორიის საკითხები ქართულში", გამოიცა ავტორის გარდაცვალების შემდეგ (1980; გაანალიზებულია 11 362 ფუძე). ამ მონოგრაფიებში საყურადღებო დასკვნებია ქართულში ზმნური თუ სახელური ფუძეების აგებულებისა და ფონემური შედგენილობის შესახებ. იგი დაინტერესებული იყო ფრაზეოლოგიით - იკვლევდა ხატოვან იდიომურ თქმებს, ანდაზებს, აფორიზმებს (ნოველების კრებული ანდაზების თემაზე გამოაქვეყნა ფ. გიორგაძის ფსევდონიმით). განსაკუთრებით იყო დაინტერესებული ენობრივი მოვლენის ისტორიით, დიაქრონიულ ასპექტში განიხილავდა პირის ნიშნებისა და ვნებითობის სუფიქსთა გენეზისის, ქცევის, სონანტური ანლაუტისა და აუსლაუტის, ზოგიერთი სიტყვაწარმოებითი აფიქსის ფუნქციისა და წარმომავლობის, ინვერსიის, მახვილის საკითხებს; შექმნა გამოკვლევათა სერია "სტრუქტურულ-ეფტიმოლოგიური ძიებანი". ენათმეცნიერი, ფილოლოგიის მეცნიერებათა დოქტორი (1968), პროფესორი (1969).

სადოქტორო დისერტაციის თემა - "ზმნური ფუძეების ფონემატური სტრუქტურისა და ისტორიის საკითხები ქართულში", დაიცვა 1968 წელს.

წყარო: ქართული ენა: ენციკლოპედია. - თბ. 2008. - გვ.188

• ძალა და აღმართი : იგავ-არაკები ქართული ანდაზების თემებზე (ავტორი). - თბილისი, ინტელექტი, 2002. - 108გვ. . - ISBN: 99928-871-1-7
• ზმნური ფუძეების ფონემატური სტრუქტურისა და ისტორიის საკითხები ქართულში (ავტორი). - თბილისი, თბილ. უნ-ტის გამ-ბა, 1970. - 358გვ.
• რთული წინადადების ისტორიისათვის ქართულში (ავტორი) // თსუ, ახალი ქართული ენის კათედრის შრომები. 4. - თბილისი, თსუ–ს გამ–ბა, 1962. - 282გვ.