ლადო აღნიაშვილი

დაბადების ადგილი: სოფელი შილდა, ყვარლის რაიონი.

დაამთვრა თელავის სასულიერო სემინარია 1877 წელს, 1881 წელს - გორის სამასწავლებლო სემინარია.

1881 წელს დაინიშნა ქართული და რუსული ენების პირველ მასწავლებლად თბილისის სათავადაზნაურო სასწავლებელში. 1883-1893წწ. მუშაობდა თბილისის ქართველ კათოლიკეთა სამრევლო სკოლაში. მისი პირველი ლექსიკოლოგიური მცდელობები დაკავშირებულია რუსული ენის სახელმძღვანელოს და რუსულ-ქართული უბის ლექსიკონის გამოცემასთან. ჩამოაყალიბა ქართველ მომღერალთა გუნდი, "ქართული ქორო", რომელმაც დიდი ისტორიული როლი ითამაშა საქართველოს კულტურულ ცხოვრებაში. მყარი საფუძველი ჩაუყარა ქართული ეროვნული სასიმღერო შემოქმედების აღორძინებას, მის პროპაგანდასა და შემდგომ განვითარებას. მისი აქტიური მონაწილეობით 1887 დაარსდა "ქართველთა წიგნების გამომცემელი ამხანაგობა", რომელმაც განსაკუთრებული წვლილი შეიტანა ქართული წიგნის ბეჭდვის ისტორიაში. ამავე წელს გამოსცა რუსულ-ქართული "უბის ლექსიკონი". მანვე შეადგინა და გამოაქვეყნა ქართული ხალხური ზღაპრების კრებული, რომელიც საფუძვლად დაედო მარჯორი უორდროპის მიერ ინგლისურად თარგმნილ "ქართულ ხალხურ ზღაპრებს". სკოლისგარეშე საკითხავად გამოსცა "ახალი ანბანის" რვა წიგნაკი. 1894 გაემგზავრა სპარსეთში შაჰ-აბასის დროს გადასახლებული ქართველების ცხოვრების შესასწავლად., შემდეგ კი ჟურნალ "მოამბეში" დაბეჭდა ეთნოგრაფიულ-ფოლკლორული ნაშრომი "სპარსეთი და იქაური ქართველები", რომელშიც გადმოცემულია იმდროინდელი სპარსეთის ყოფა-ცხოვრება, აღწერილია ფერეიდნელ ქართველთა ზნე-ჩვეულებანი, ეკონომიკურ-კულტურული მდგომარეობა.

წყარო: განმანათლებლობა საქართველოში - იდეები და მოღვაწეები: nateba.webbreeze.net; ქართული ენა: ენციკლოპედია. - თბ. 2008. - გვ.66-67

• სპარსეთი და იქაური ქართველები : მგზავრის წერილები (ავტორი). - ტფილისი, ქართველთა წიგნის გამომცემელი ამხანაგობის სტ., 1896. - 328გვ.
• პასუხად ქაჩალ კრიტიკოს ბ. პაატას [მიხ. ნასიძეს] და ორი კითხვა "ივერიის" რედაქციისადმი (ავტორი). - თბილისი, ქართველთა ამხანაგობის სტ., 1893. - 99გვ.
• ხალხური ზღაპრები, წიგნი 1 (შემდგენელი). - თბილისი, გამოცემა ქართველთა ამხანაგობისა, 1890. - 142გვ.
• უბის ლექსიკონი [რუსულ-ქართული] (ავტორი). - ტფილისი, გრ. ჩარკვიანის სტ., 1887. - 47გვ.