გიორგი ძოწენიძე

დაბადების ადგილი: ქ. ქუთაისი.

დაამთავრა თბილისის სახელმწიფო უნივერსიტეტი 1929 წელს.

1931 წლიდან მოღვაწეობასა ეწეოდა იქვე (1933-1934წწ. - აგრეთვე ა. წულუკიძის სახელობის ქუთაისის პედაგოგიურ ინსტიტუტში); 1936-1941წწ. მუშაობდა აგრეთვე თსუ-ის გეოლოგიის ინსტიტუტში; 1941 წლიდან საქართველოს სსრ მეცნიერებათა აკადემიის გეოლოგიის ინსტიტუტში, სადაც ხელმძღვანელობდა გამოკვლევებს ვულკანოლოგიისა და ლითოლოგიის დარგში; 1951-1955წწ. იყო საქართველოს სსრ მეცნიერებათა აკადემიის აკადემიკოს-მდივნის მოვალეობის შემსრულებელი; 1955-1958წწ. პირველი ვიცე-პრეზიდენტი; 1955-1959წწ. და 1976 წლიდან პრეზიდიუმის წევრი; 1973 წლიდან იყო სსრკ გეოლოგთა, ეროვნული კომიტეტის თავმჯდომარე; 1957-1959წწ. თბილისის სახელმწიფო უნივერსიტეტის მინერალოგიისა და პეტროგრაფიის კათედრის გამგე; 1958-1959წწ. ამავე უნივერსიტეტის რექტორი; სკკპ XXII-XXIV ყრილობებზე არჩეული იყო სკკპ ცენტრალური სარევიზიო კომისიის წევრად; 1959-1976წწ. იყო საქართველოს კომპარტიის ცკ-ის ბიუროს წევრი, სსრკ უმაღლესი საბჭოს V-IX მოწვევების და საქართველოს სსრ უმაღლესი საბჭოს IV-IX მოწვევების დეპუტატი. მისი ძირითადი სამეცნიერო შრომები ეხება პალეოვულკანოლოგიისა და ლითოლოგიის საკითხებს; საქართველოს მიოცენამდელი ვულკანური წარმონაქმნების კვლევის შედეგად დაასაბუთა მაგმატიზმის ქიმიური ევოლუციის დამოკიდებულება რეგიონის გეოტექტონური განვითარების ისტორიასთან; მისი ხელმძღვანელობით და უშუალო მონაწილეობით ჩაეყარა საფუძველი საქართველოს ტერიტორიის სისტემურ ლითოლოგიურ კვლევას; ქუთაისის მიდამოებში აღმოაჩინა და შეისწავლა ანალციმიანი ქვიშაქვები; დაასაბუთა ვულკანიზმის როლი ლითოგენეზისსა და მადანთწარმოქმნაში; საფუძველი ჩაუყარა მოძღვრებას ვულკანოგენურ დანალექი ლითოგენეზისა და მადანთწარმოშობის შესახებ. გეოლოგიურ-მინერალოგიურ მეცნიერებათა დოქტორი (1947), პროფესორი (1948), სახელმწიფო და პარტიული მოღვაწე.

წყარო: ქართული საბჭოთა ენციკლოპედია: ტ. 11.-თბ., 1987.-გვ.280

• აშშ-ის გეოგრაფიის საზოგადოება, წევრი (1971-)
• ბულგარეთის გეოლოგიის საზოგადოება, წევრი (1971-)
• ვულკანოლოგთა და სედიმენტოლოგთა საერთაშორისო ასოციაცია, წევრი (1970-)
• ლონდონის გეოლოგიის საზოგადოება, წევრი (1975-)
• საქართველოს კომპარტიის ცკ-ის ბიურო, წევრი (1959-1976)
• საქართველოს მეცნიერებათა აკადემია, აკადემიკოსი (1955-1976)
• საქართველოს სსრ უმაღლესი საბჭოს პრეზიდიუმი, თავმჯდომარე (1959-1976)
• სკკპ, წევრი (1940-)
• სსრკ მეცნიერებათა აკადემია, აკადემიკოსი (1968-)
• სსრკ უმაღლესი საბჭოს პრეზიდიუმი, თავმჯდომარის მოადგილე (1960-)

• 1950 - სტალინური პრემია
• ოქტომბრის რევოლუციის ორდენი
• ლენინის ორდენი (3 ორდენი)
• შრომის წითელი დროშის ორდენი

• არსებობს თუ არა თბილისის მიდამოებში ჩამქრალი ვულკანები : თბილისში წაკითხული საჯარო ლექციის სტენოგრამა (ავტორი). - თბილისი, საქ. სსრ პოლიტ. და მეცნ. ცოდნის გამავრც. საზ-ბა, 1956. - 28გვ.
• ქუთაისის მიდამოების ახალგაზრდა დიორიტული ქანები (ავტორი). - თბილისი, თბილისის სახელმწ. უნ-ტის გამ-ბა, 1948. - 98გვ.
• მასალები პორფირიტული წყების პეტროგრაფიისათვის : ზემო-სვანეთი და სამხრეთ-ოსეთი (ავტორი). - თბილისი, "ტექნიკა და შრომას" გამ-ბა, 1938. - 360გვ.