გიორგი მელიქიშვილი

დაბადების ადგილი: ქ. თბილისი.

დაამთავრა თბილისის სახელმწიფო უნივერსიტეტის ისტორიის ფაკულტეტი 1939 წელს.

1944 წლიდან მუშაობდა ისტორიის ინსტიტუტში მეცნიერ თანამშრომლად. 1965-1999წწ. საქართველოს მეცნიერებათა აკადემიის ივანე ჯავახიშვილის სახელობის ისტორიის, არქეოლოგიისა და ეთნოგრაფიის ინსტიტუტის დირექტორი; 1999-2002წწ. ამავე ინსტიტუტის საპატიო დირექტორი. გ. მელიქიშვილის ფუნდამენტურმა ნაშრომებმა ძვ. აღმოსავლეთის ისტორიისა და ფილოლოგიის დარგში, ახალი ეტაპი შექმნეს მსოფლიო ურარტოლოგიაში. იგი ავტორია აგრეთვე მრავალი გამოკვლევისა ხურიტების, ხეთების, ასურეთის, ზაგროსის მთიანეთისა და ძვ. აღმოსავლეთის სხვა ქვეყნების ისტორიაში. ასურული და ურარტული წერილობითი წყაროების შუქზე  გამოიკვლია უძველესი ქართველური პოლიტიკური გაერთიანებების - კულხასა და დიაუხის ისტორიის საკითხები; დაამუშავა საქართველოს ძვ. ისტორიისა და ფეოდალური ხანის მრავალი კარდინალური პრობლემა; ძვ. წინა აზიისა და კავკასიური უძველესი კლასობრივი პრობლემა; ძვ. წინა აზიისა და კავკასიის უძველესი კლასობრივი საზოგადოებების (მათ შორის საქართველოს) სოციალურ-ეკონომიკური წყობა. იყო "საქართველოს ისტორიის ნარკვევების" რვატომეულის მთავარი რედაქტორი, I ტომის რედაქტორი და იმავე ტომის ერთ-ერთი ავტორი; მონაწილეობდა სასკოლო სახელმძღვანელოების მომზადება-გამოცემაში, თანამშრომლობდა ქართული ენციკლოპედიის მთავარ სამეცნიერო რედაქციასთან; იყო მეცნიერთა არაერთი საერთაშორისო ფორუმის მონაწილე მიუნხენსა და მოსკოვში (1957, 1966), სტოკჰოლმსა და ლოს-ანჟელესში (1960, 1973), ტოკიოსა და ჩიკაგოში (1968, 1973). 2010 წელს საქართველოს მეცნიერებათა ეროვნულმა აკადემიამ დააწესა გ. მელიქიშვილის სახელობის პრემია.

წყარო: ქართული საბჭოთა ენციკლოპედია: ტ. 6.-თბ.,1983.- გვ. 558; წიგნი ღირსებისა: ტ. 3/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2001. - გვ.263; საქართველოს მეცნიერებათა ეროვნული  აკადემია: ქართული ენციკლოპედიის ი. აბაშიძის სახელობის მთავარი სამეცნიერო რედაქცია: georgianencyclopedia.ge

• საქართველოს მეცნიერებათა აკადემია, აკადემიკოსი (1960-)

• 1998 - ღირსების ორდენი
  ქართული მეცნიერების განვითარებაში შეტანილი განსაკუთრებული წვლილისათვის, ნაყოფიერი სამეცნიერო, პედაგოგიური და საზოგადოებრივი მოღვაწეობისათვის
• 1982 - საქართველოს სახელმწიფო პრემია
• 1976 - ივანე ჯავახიშვილის სახელობის პრემია
• 1966 - საქართველოს მეცნიერებათა დამსახურებული მოღვაწე
• 1957 - ლენინური პრემია
• საპატიო ნიშნის ორდენი
• შრომის წითელი დროშის ორდენი

• უძველეს კლასობრივ საზოგადოებათა სოციალურ-ეკონომიკური წყობის პრობლემა (ავტორი). - თბილისი, არტანუჯი, 2003. - 292გვ.. - ISBN: 99940-11-01-4
• ძიებანი საქართველოს, კავკასიისა და ახლო აღმოსავლეთის ძველი ისტორიის დარგში (ავტორი). - თბილისი, ჯალი, 1999. - 667გვ.. - ISBN: 99928-41-00-1
• საქართველოს ისტორია : საკითხავი წიგნი (შემდგენელი). - თბილისი, მეცნიერება, 1990. - 384გვ.
• ფეოდალური საქართველოს პოლიტიკური გაერთიანება და საქართველოში ფეოდალურ ურთიერთობათა განვითარების ზოგიერთი საკითხი (ავტორი). - თბილისი, მეცნიერება, 1973. - 167გვ.
• როგორ ამეტყველდნენ ლურსმული წარწერები (ავტორი). - თბილისი, ნაკადული, 1961. - 131გვ.