ფატი ხუნდაძე

დაბადების ადგილი: ქ. ქუთაისი.

1915-1918 წლებში მუშაობდა პედაგოგად; 1918 წელს ჩაირიცხა თბილისის სახელმწიფო უნივერსიტეტის სიბრძნისმეტყველების ფაკულტეტზე. იმავე წელს, სხვა ქართველ ახალგაზრდებთან ერთად სწავლის გასაგრძელებლად გაგზავნეს გერმანიაში, სადაც 1924 წელს დაასრულა ბერლინის ჰუმბოლდტის სახელობის უნივერსიტეტის ფილოსოფიის ფაკულტეტი. მომდევნო წელს მას მიენიჭა ამავე უნივერსიტეტის ფილოსოფიის დოქტორის სამეცნიერო ხარისხი ფსიქოლოგიის დარგში.

1926 წელს იგი საქართველოში დაბრუნდა. მრავალი წლის მანძილზე მოღვაწეობდა თბილისის პედაგოგიკის სამეცნიერო-კვლევით ინსტიტუტში, თბილისის სახელმწიფო უნივერსიტეტში და საქართველოს მეცნიერებათა აკადემიის ფსიქოლოგიის ინსტიტუტში. დ. უზნაძესთან ერთად იგი იყო ბავშვთა ფსიქოლოგიის ქართული სამეცნიერო სკოლის ფუძემდებელი. კერძოდ, მის შრომებში განხილულია ბავშვებში აზროვნების განვითარების და გენეტიკურ ჭრილში ესთეტიკური აღქმის საკითხები. 1935 წელს მას მიენიჭა ფსიქოლოგიის მეცნიერებათა დოქტორის სამეცნიერო ხარისხი. იყო არაერთი მნიშვნელოვანი სამეცნიერო გამოკვლევის (მათ შორის რამდენიმე მონოგრაფიის) ავტორი. მისი შრომები გამოქვეყნებულია როგორც ქართულ და რუსულ, ისე გერმანულ სამეცნიერო პერიოდულ გამოცემებში. პირველი დოქტორი ქალი ამიერკავკასიაში, საქართველოში ბავშვთა ფსიქოლოგიის ერთ-ერთი ფუძემდებელი, პროფესორი. გამოჩენილი პედაგოგის და საზოგადო მოღვაწის სილოვან ხუნდაძის ქალიშვილი.

წყარო: მეცნიერი ქალი: geowomen.wordpress.com

• ბავშვთა ფსიქოლოგიის ქართული სამეცნიერო სკოლა, ერთ-ერთი დამფუძნებელი
• საქართველოს მეცნიერებათა დამსახურებული მოღვაწე

• საქართველოს მეცნიერებათა დამსახურებული მოღვაწე

• სკოლამდელი ასაკის ბავშვთა სწავლების ფსიქოლოგიური საფუძვლების საკითხისათვის (ავტორი). - თბილისი, მეცნიერება, 1966. - 198გვ.
• ბავშვთა შრომითი მოქმედების ფსიქოლოგიური საფუძვლები (ავტორი). - თბილისი, საქ. სსრ მეცნ. აკად. გამ-ბა, 1962. - 137გვ.
• საბავშვო ბაღში მხატვრულ სურათზე მუშაობის მეთოდიკა (ავტორი). - თბილისი, 1942. - 70გვ.
• დიდაქტიკური სათამაშოები საბავშვო ბაღში (ავტორი). - თბილისი, 1941. - 28გვ.