ნიკოლოზ გერსევანოვი

დაბადების ადგილი: ქ. თბილისი.

დაამთავრა პეტერბურგის მიმოსვლის გზათა ინჟინრების ინსტიტუტი 1901 წელს.

ორი წელი რკინიგზის მშენებლობაზე, ხოლო, 1904-1918წწ. პეტერბურგის, ნარვისა და კრონშტადტის პორტების გაფართოებაზე მუშაობდა. პარალელურად, 1907 წლიდან პეტერბურგის პოლიტექნიკურ ინსიტუტში მოღვაწეობდა; 1911 წლიდან ანვითარებდა საძირკველმშენებლობის სრულყოფის იდეას, რომელიც განპირობებული იყო ფუძისა და ნაგებობების ერთობლივი დეფორმატიულობის დადგენის პრიორიტეტით. იკვლევდა გრუნტების მექანიკის პრობლემებს. იგი არის გრუნტების მექანიკის საბჭოთა სკოლის ფუძემდებელი და ავტორი მრავალი ნაშრომისა გრუნტების მექანიკისა და გამოყენებითი მათემატიკის დარგში. მან მათემატიკაში შემოიტანა მონოგრაფიული აღრიცხვა საინჟინრო საქმეში (1906-1908); ერთ-ერთმა პირველმა დაიწყო ახალი მათემატიკური მეთოდების გამოყენება საინჟინრო გაანგარიშებებში, კერძოდ, ლოგიკის ალგებრაში; 1913 წლიდან მან შეიმუშავა ხიმინჯებზე კონსტრუქციის გაანგარიშების მეთოდი, რომელმაც მალევე ჰპოვა პრაქტიკული გამოყენება პორტების მშენებლობაში - ააშენა პეტერბურგის პორტის რკინა-ბეტონის ხიდი; 1917 წლიდან იგი მოსკოვის გზათა საინჟინრო ინსტიტუტში საპორტო მშენებლობის კათედრის გამგე იყო: კითხულობდა ლექციების კურსს: "პორტები, დრეკადობის თეორია და გრუნტების მექანიკა". მას კავშირი არ გაუწყვეტია საქართველოსთან. 1921 წელს თბილისის სახელმწიფო პოლიტექნიკურ ინსტიტუტში ჰიდროტექნიკურ ნაგებობათა კურსს კითხულობდა; 1923 წლიდან მოსკოვის გზათა მიმოსვლის ინჟინერთა ინსტიტუტის პროფესორი იყო; 1931 წლიდან - ნაგებობათა საძირკვლების საკავშირო ინსტიტუტის მეცნიერ-ხელმძღვანელი და სამხედრო-სატრანსპორტო აკადემიის ჰიდროტექნიკურ ნაგებობათა კათედრის უფროსი; მისი ხემძღვანელობით კათედრა იქცა უმსხვილეს საკავშირო სამეცნიერო კვლევით ცენტრად, რომელსაც ეწოდა "ფუძეებისა და მიწისქვეშა ნაგებობათა ინსტიტუტი". იგი სიცოცხლის ბოლომდე ამ ინსტიტუტის რექტორი იყო; ნიკოლოზ გარსევანიშვილის კონსულტაციითა და აქტიური მონაწილეობით 1928 წელს განხორციელდა ფოთის ნავსადგურის რეკონსტრუქცია; ხელმძღვანელობდა შავი ზღვის სანაპიროზე რკინიგზის (სოხუმი-გაგრის მონაკვეთის) მაგისტრალის მშენებლობის საინჟინრო-გეოლოგიური კვლევის სამუშაოებს; უშუალო ხელმძღვანელობას უწევდა ისეთ დიდ მშენებლობებს, როგორიც იყო მოსკოვის მეტრო, მოსკოვ-ვოლგის არხი, მოსკოვის ყრილობათა სასახლე, მრავალი სამრეწველო და ჰიდროტექნიკური ობიექტი; სამხედრო-თავდაცვითი და ნავსადგურთა მშენებლობის პროექტის ერთ-ერთი შემქმნელი; მისი აღმოჩენები, ფორმულები, თეორიული და ექსპირიმენტული კვლევები, ასევე პრაქტიკული დასკვნები მსოფლიო ტექნიკური მეცნიერების მნიშვნელოვანი შენაძენია, რომელიც წარმატებით გამოიყენება დღესაც. 1973 წელს გრუნტების მექანიკისა და საძირკველმშენებლობის მე-8 საერთაშორისო კონგრესის მონაწილე მშენებელ სპეციალისტთა და მეცნიერთა გადწყვეტილებით მსოფლიოში უდიდეს მოსკოვის ფუძეებისა და მიწისქვეშა ნაგებობათა სამეცნიერო-კვლევით ინსტიტუტს ნიკოლოზ გარსევანიშვილის სახელი მიენიჭა. იგი იყო ამ დარგის ფუნდამენტური გამოკვლევებისა და სახელმძღვანელოების ავტორი. რუსეთში მოღვაწე მეცნიერი მექანიკის დარგში.

წყარო: საქართველო: ენციკლოპედია: ტ.I.–თბ., 1997.–გვ.601; საქართველოს მათემატიკოსები და მექანიკოსები: ბიოგრაფიული ცნობარი/ნოდარ მახვილაძე. -თბ., 2016. -გვ.196-198

• სსრკ მეცნიერებათა აკადემია, წევრ–კორესპონდენტი (1939-)

• 1948 - სსრკ სახელმწიფო პრემია
• 1936 - რსფსრ მეცნიერებისა და ტექნიკის დამსახურებული მოღვაწე