ალექსანდრე გომელაური

დაბადების ადგილი: ქ. თბილისი.

სკოლის დამთავრების შემდეგ სწავლა განაგრძო თბილისის სახელმწიფო უნივერსიტეტის ეკონომიკურ ფაკულტეტზე 1929 წელს. სასცენო მოღვაწეობა დაიწყო თბილსის მუშათა თეატრში 1927 წელს. 1928-1931 წლებში მიიწვიეს ახლადდაარსებულ თბილისის მოზარდ მაყურებელთა ქართულ თეატრში, სადაც მოღვაწეობდა 1931 წლებში. 1931-1933 წლებში დაკავებული იყო ქუთაისის მოზარდ მაყურებელთა ქართულ თეატრში, ხოლო 1933 წლიდან გარდაცვალებამდე კ. მარჯანიშვილის სახელობის თეატრის მსახიობი იყო. შესრულებული აქვს 150–მდე როლი, მათ შორის: შვეიკი (ი. ჰაშეკის "გულადი ჯარისკაცი შვეიკი"), კაკუტა (პ. კაკაბაძის "ყვარყვარე თუთაბერი"), გიორგი (ი. ჭავჭავაძის "ჩატეხილი ხიდი"), თავადი მანუჩარი, გუბერნატორი, სმაგინი (შ. დადიანის "ნინოშვილის გურია", "ნაპერწკლიდან"), კინტო და რუსი მუჟიკი (ზ. ანტონოვის "მზის დაბნელება საქართველოში"), გრომოვი (ი. ვაკელის "შამილი"), გიჟუა და მოურავი (ავქ. ცაგარელის "რაც გინახავს, ვეღარ ნახავ"), ბობჩინსკი (ნ. გოგოლის "რევიზორი"), ბანკირი (ვ. ტოლერის "ჰოპლა, ჩვენ ვცოცხლობთ"), როდრიგო, კაპულეტი (უ. შექსპირის "ოტელო" და "რომეო და ჯულიეტა") და სხვა. კინოროლებიდან აღსანიშნავია: სამხედრო ექიმი (1941, "ქალიშვილი გაღმიდან"), დევი (1955, "ცისკარა"), ომარაშვილი (1957, "ოთარაანთ ქვრივი"), ილია ჭავჭავაძე (1961, "გლახის ნაამბობი"). ალ. გომელაური საესტრადო ჟანრის ოსტატიც იყო და ხშირად ასრულებდა სკეტჩებსა და მინიატურებს. 

წყარო: საქართველო: ენციკლოპედია: ტ.2. – თბ., 2012. – გვ.90; 2007 წლის საიუბილეო თარიღები: თეატრი, მუსიკა, კინო, ქორეოგრაფია.- თბ., 2007.- გვ.87

• 1958 - საქართველოს სახალხო არტისტი
• 1943 - საქართველოს დამსახურებული არტისტი