ავქსენტი გამსახურდია

დაბადების ადგილი: ქ. თბილისი.

სწავლობდა შოთა რუსთაველის სახელობის სახელმწიფო თეატრალური ინსტიტუტის სარეჟისორო ფაკულტეტზე (რეჟისორ გ. ტოვსტონოგოვის კლასი) 1944–1948 წლებში. მე-4 კურსიდან გადავიდა მოსკოვის ლუნაჩარსკის სახელობის სახელმწიფო თეატრალური ხელოვნების ინსტიტუტის სარეჟისორო ფაკულტეტზე, რომელიც 1950 წელს დაამთავრა.

1950–1952 წ. მუშაობდა სოხუმის სახელმწიფო დრამატული თეატრის ქართული დასის დამდგმელი რეჟისორად, სადაც დადგა სპექტაკლები: ბ. ლავრენიოვის "ამერიკის ხმა", კ. გოლდონის "სასტუმროს დიასახლისი", კ. ბუაჩიძის "ფაქიზი განცდები", ი. ბურიაკოვსკის "პრაღა მაინც ჩემია" და სხვა; 1952–1953 წლებში მუშაობდა ფოთის თეატრის მთავარ რეჟისორად, სადაც დადგა პიესები: ი. ჭავჭავაძის "ოთარაანთ ქვრივი", ო. ვასილიევის "ამქვეყნიური სამოთხე", ლოპე დე ვეგას "ცეკვის მასწავლებელი" და სხვა; 1953–1955 წლებში თბილისის შ. რუსთაველის სახ. თეატრალური ინსტიტუტის პედაგოგია; 1958-1964 წლებში თბილისის მოზარდ მაყურებელთა ქართული თეატრის მთავარი რეჟისორია, სადაც განახორციელა დადგმები: გ. ივანიშვილის "კომეტა ბ-2", ალ. ყაზბეგის "ციცია", ვ. ჰიუგოს "კაცი, რომელიც იცინის", ვ. გოგოლაშვილის "წეროები", მოლიერის "ტარტიუფი" და სხვა; 1964 წლიდან მოსკოვის ცენტრალური საბავშვო, მოსკოვის მოზარდ მაყურებელთა, ვ. მაიაკოვსკის სახ. აკადემიური სახელმწიფო თეატრების რეჟისორია. ამ თეატრებში დადგა სპექტაკლები: ვ. გოგოლაშვილის "წეროები", ჰ. ლის "ნუ მოკლავთ მგალობელ ჩიტს", ფ. კრონეს "მამა", ხ. ლოვინესკუს "და ჩამოვარდა ვარსკვლავი"; 1967–1976 წლებში მოსკოვის თოჯინების სახელმწიფო თეატრის მთავარი რეჟისორია, სადაც განახორციელა შემდეგი პიესების დადგმა: ლ. მიტროფანოვის "პეტრუშკა ცოცხალია", მ. გორკის "ადამიანთა ძლიერი ტომი", მოლიერის "სკაპენის ოინები", ჯ. ოლდრიჯის "სოს", ს. მიხალკოვის "სიცილი და ცრემლები", პროკოფიევის "ბოდიშს არ მოვიხდი" და სხვა; 1953–1955 წლებსა და 1982 წლიდან საქართველოს შ. რუსთაველის სახ. სახელმწიფო თეატრისა და კინოხელოვნების ინსტიტუტში ეწეოდა პედაგოგიურ მოღვაწეობას. იყო ამავე ინსტიტუტის პრორექტორი 1990-1997 წლებში. გადაღებულია ი. კარასკის მოკლემეტრაჟიან ფილმში "კეთილი ქალაქი" (დ. გულიას მოთხრობის მიხედვით), განასახიერა მთავარი როლი, ამავე დროს იყო ფილმის თანაავტორი და თანარეჟისორი (1950). პროფესორი (1990).

წყარო: საქართველო: ენციკლოპედია: ტ.I.–თბ., 1997.–გვ.543; 2007 წლის საიუბილეო თარიღები: თეატრი, მუსიკა, კინო, ქორეოგრაფია.- თბ., 2007.- გვ.116

• 1962 - საქართველოს ხელოვნების დამსახურებული მოღვაწე