თემურ ყვითელაშვილი

დაბადების ადგილი: ქ. თბილისი.

მსოფლიოში ერთ-ერთი საუკეთესო ვირტუოზი გიტარისტი, კომპოზიტორი, მომღერალი, არანჟირებების ავტორი თემურ ყვითელაშვილი არის თვითნასწავლი გიტარისტი. იგი მუსიკალური განათლების გარეშე დამოუკიდებლად დაეუფლა გიტარაზე დაკვრას და გამოიმუშავა გიტარაზე დაკვრის საკუთარი სტილი; არის პირველი ქართველი გიტარისტი საქართველოში, რომელმაც 1975 წლიდან დაიწყო ქართული კლასიკური და თანამედროვე მუსიკის დამუშავება და ტრანსკრიპციების შექმნა ელექტრო გიტარისთვის; აგრეთვე შექმნა ტრანსკრიპციები და დაამუშავა ელექტრო გიტარისთვის მსოფლიო კლასიკოსების: ბახის, მოცარტის, პაგანინის, შუბერტის, რიმსკი-კორსაკოვის, შოპენის და სხვა კომპოზიტორების ნაწარმოებები; არის პირველი ინსტრუმენტალისტი საქართველოში, რომელმაც ჩაატარა სოლო კონცერტი თბილისის ფილარმონიის დიდ საკონცერტო დარბაზში; სოლო კარიერის პარალელურად თანამშრომლობდა ცნობილ და აღიარებულ ინსტრუმენტალისტებთან, ვოკალისტებთან და ანსამბლებთან როგორც საქართველოში, ისე ყოფილ საბჭოთა კავშირის ტერიტორიაზე და მის ფარგლებს გარეთ; 1985 წლიდან უკვე ითვლებოდა ერთ-ერთ საუკეთესო გიტარისტად ყოფილი საბჭოთა კავშირის და ბალტიისპირეთის ქვეყნების ტერიტორიაზე; მრავალი წლის განმავლობაში იყო და არის მსოფლიოში ცნობილი და პრესტიჟული გიტარების და მუსიკალური აღჭურვილობის ბრენდების სახე, მას ყოველწლიურად იწვევენ ისეთ პრესტიჟულ გამოფენებზე როგორებიც არის: "NAMM Show", "NAMM Musikmesse", "Moscow - Music "; მისი მუსიკა და კონცერტები ხშირად გადაიცემა რადიოთი და ტელევიზიით; საქართველოს საზოგადოებრივ ტელევიზიაში იყო ავტორი და წამყვანი გადაცემის: "თანამედროვე მსოფლიო საგიტარო ხელოვნება", რომელიც დიდი პოპულარობით სარგებლობდა; თ. ყვითელაშვილის სახელი შეტანილია ბიოგრაფიულ ცნობარსა და ენციკლოპედიაში: "ვინ ვინაა საქართველოში", "საქართველოს მუსიკალური ენციკლოპედია"; მის მიერ შესრულებული რამდენიმე კომპოზიცია შესულია მსოფლიოს საუკეთესო გიტარისტების აუდიო კრებულებში და გამოცემულია CD-ის სახით; სოლო კონცერტებით და მასტერკლასებით გასტროლებზე იმყოფებოდა ისეთ ქვეყნებში როგორიც არის: აშშ, კანადა, ინგლისი, ავსტრალია, იაპონია, სამხრეთ აფრიკა, საფრანგეთი, ისრაელი, ავსტრია, ბელგია, შვედეთი, რუსეთი, გერმანია, უკრაინა, ყაზახეთი, ბალტიისპირეთის ქვეყნები და მრავალი სხვა; სოლო კონცერტები აქვს ჩატარებული ისეთ პრესტიჟულ დარბაზებში როგორებიც არის: "Carnegie Hall ", "Birdland ", "The Baked Potato ", "La Ve Lee", "Дом Музыки ", "Iridium " და მრავალი სხვა; სპეციალური სტუმრის სტატუსით გამოდიოდა ისეთ ლეგენდარულ გიტარისტებთან ერთად როგორებიც არიან: Allan Holdsworth,  Les Paul , Scott Henderson, Tommy Emmanuel, Michael Angelo Batio და სხვა. თ. ყვითელაშვილს ჩაწერილი აქვს 9 სოლო ალბომი. 2022 წლის 22 ოქტომბერს თბილისის სახელმწიფო საკონცერტო დარბაზის წინ საზეიმოდ გაიხსნა თემურ ყვითელაშვილის სახელობითი ვარსკვლავი.

წყარო: ქართული ბიოგრაფიული ცნობარი. – თბ., 1998-1999. - გვ. 338; ქართული მუსიკის ენციკლოპედიური ლექსიკონი. – თბ., 2015. – გვ.507; წიგნი ღირსებისა: ტ. 3/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2001. - გვ.283

• 2019 - აფხაზეთის ავტონომიური რესპუბლიკის უმაღლესი საბჭოს "საპატიო სიგელი"
• 2018 - ისრაელის სახელმწიფოს "საპატიო სიგელი "
• 2013 - თბილისის საპატიო მოქალაქე
• 2013 - ახალციხის საპატიო მოქალაქე
• 2004 - მსოფლიო რეკორდი -"გინესის რეკორდების წიგნი " (ქ. ანგარსკი, რუსეთი)
  30 საათი შეუჩერებელი დაკვრა გიტარაზე
• 1998 - ღირსების ორდენი
  • თანამედროვე ქართული საესტრადო ხელოვნების განვითარებასა და პოპულარიზაციაში შეტანილი პირადი დიდი წვლილისა და ნაყოფიერი შემოქმედებითი მოღვაწეობისათვის
• 1996 - საქართველოს საუკეთესო ინსტრუმენტალისტი
• 1994 - წლის საუკეთესო გიტარისტი, ნომინაცია "ფიუჟენ" ("Fusion") (ქ. ლოს ანჯელესი, აშშ)