გრიგოლი (ოშკელი)

საქართველოს ეკლესიის მღვდელმთავარი, ოშკის ტაძრის მშენებელი; მოხსენიებულია ოშკის ტაძრის დიდ სამშენებლო წარწერაში: "მე გრიგოლ ღირსმყო ღმერთმან მსახურებისა ამას მათსა ღმრთისა მიმართ, და მე ვიყავ საქმესა ზედა მდგომი"; წარწერა X საუკუნის 60–იანი წლებით თარიღდება; მუხლმოდრეკილი, ხელებაპყრობილი გრიგოლი გამოსახულია ტაძრის სამხრეთ გალერეაში, რელიეფებიან ბოძზე, ვედრების კომპოზიციის ქვეშ; ე. თაყაიშვილს გამოთქმული აქვს მოსაზრება, რომ შესაძლოა გრიგოლ ღვთისმეტყველის ზოგიერთი ნაწარმოების მთარგმნელი გრიგოლ ოშკელი იყოს; ოშკის ტაძარი შუა საუკუნეების საქართველოს ერთ-ერთი უდიდესი საკულტო ნაგებობაა და მხატვრული და ისტორიული თავლსაზრისით ღირსეული ადგილი უკავია ქართული ხელოვნების ისტორიაში.

წყარო: საქართველო: ენციკლოპედია: ტ.2. – თბ., 2012. – გვ.153