ლადო გრიგოლია

დაბადების ადგილი: სოფელი სეფიეთი, აბაშის რაიონი.

დაამთავრა თბილისის სამხატვრო აკადემია 1930 წელს.

აკადემიაში სწავლის პერიოდში ერთდროულად მუშაობდა იაკობ ნიკოლაძის ქანდაკების სახელოსნოში და იოსებ შარლემანის გრაფიკის სტუდიაში; 1928 წლიდან მონაწილეობდა სამხატვრო გამოფენებში; 1920-1930 წლებში ძირითადად მუშაობდა როგორც მოქანდაკე. 1932 წლიდან მუშაობდა გრაფიკაში, შექმნილი აქვს შრიფტის მრავალი გარნიტურა და წიგნის სამკაულები, რომლებიც ძველქართულ ხელნაწერებსა და ნაბეჭდი წიგნების დეკორის მასალას დააფუძნა; მან შექმნა წიგნის მორთულობის ახალი კომპოზიციები, ქართული შრიფტის ახალი ვარიანტები. მისი ნაშრომი "ქართული კონსტრუქციული და აკადემიური შრიფტი" დაედო საფუძლად სამხატვრო აკადემიაში შრიფტის სწავლების დისციპლინას; 1933 წლიდან ეწეოდა პედაგოგიურ მოღვაწეობას; გაფორმებული აქვს 100-ზე მეტი წიგნი; მის მიერ მხატვრულად გაფორმებულია უნიკალური გამოცემები: "ვეფხისტყაოსანი" (1937), აკაკი წერეთელი (1940), ნიკოლოზ ბარათაშვილის საიუბილეო გამოცემა, ქართული პოეზიის ანთოლოგია ინგლისურ ენაზე, ქართული საბჭოთა ენციკლოპედია, გალაკტიონ ტაბიძის, კონსტანტინე გამსახურდიას წიგნები; დახატული აქვს გიორგი სააკაძისა და გრიგოლ ორბელიანის პორტრეტები; შექმნა კამერული ქანდაკებები: "სამშობლო" (1928), "ქალიშვილის თავი" (1928), "ქართველი ქალი" (1928), შოთა რუსთაველის ძეგლის პროექტი (1936). 1934 წელს, ლადო გრიგოლიას ექსლიბრისს, ერთადერთს საბჭოთა გრაფიკოსებიდან მიენიჭა საპატიო დიპლომი წიგნების საერთაშორისო გამოფენაზე კალიფორნიაში; 1958 წელს, ლადო გრიგოლიამ უხელმძღვანელა და მხატვრულად გააფორმა მოსკოვში, ქართული ლიტერატურისა და ხელოვნების დეკადის პროგრამა: მან შექმნა გერბი და მრავალი პლაკატი – მისმა  დიზაინმა დიდი წარმატება მოუტანა პროგრამას.  მხატვრის საცხოვრებელ სახლში (კ. ქუთათელაძის ქუჩა, N4) მხატვრის სახელოსნოა, სადაც ინახება ხელოვანის არქივი და საინტერესო შემოქმედებითი მემკვიდრეობა. მხატვარ ინა დივნოგორცევა-გრიგოლიას მეუღლე.

წყარო: საქართველო: ენციკლოპედია: ტ.2. – თბ., 2012. – გვ.155; ახალი და უახლესი ქართული ვიზუალური ხელოვნების პორტალი: art.gov.ge

• მხატვართა გაერთიანება "სარმა", წევრი (1930-1932)
• ქართველ ხელოვანთა საზოგადოება, წევრი (1928-1929)

• 1973 - შოთა რუსთაველის სახელობის სახელმწიფო პრემია
• 1969 - საქართველოს სახალხო მხატვარი
• 1958 - საპატიო ნიშნის ორდენი