მაქსიმე ბერძნიშვილი

დაბადების ადგილი: ქ. თბილისი.

დაამთავრა თბილისის სასულიერო სემინარია 1910 წელს; 1912-1916წწ. სწავლობდა ვარშავის უნივერსიტეტის ისტორიულ-ფილოლოგიურ ფაკულტეტზე.

მუშაობდა მდივნის მოადგილედ ქართველთა შორის წერა–კითხვის გამავრცელებელი საზოგადოების გამგეობაში; 1918 წლიდან მასწავლებლობდა; 1921-1925წწ. მუშაობდა შრომის სახელმწიფო კომიტეტში, განსახკომში, თბილისის აღმასკომის სახალხო განათლების განყოფილებაში; შექმნა ქართული საადმინისტრაციო-საკანცელარიო ტერმინოლოგია; 1925-1932წწ. იყო საქართველოს წიგნის პალატის გამგე, შემდეგ გამგის მოადგილე. მისი ხელმძღვანელობით დაარსდა წიგნის პალატის ორგანოები: "ბიბლიოგრაფიის მოამბე", "წიგნის მატიანე", "გაზეთის მატიანე"; 1932-1934წწ. მუშაობდა ქართული ენციკლოპედიის რედაქციაში სიტყვანის განყოფილების გამგედ; 1937 წელს მონაწილეობდა რუსულ-ქართული ლექსიკონის შედგენაში; 1934-1954წწ. თბილისის სახელმწიფო უნივერსიტეტში, სოხუმის, გორისა და ცხინვალის პედაგოგიურ ინსტიტუტებში კითხულობდა ლექციების კურსს ძველი აღმოსავლეთისა და საბერძნეთ-რომის ისტორიაში; 1945 წლიდან მუშაობდა ივანე  ჯავახიშვილის სახელობის ისტორიის, არქეოლოგიისა და ეთნოგრაფიის ინსტიტუტში უფროს მეცნიერ–თანამშრომლად. მისი გამოკვლევა "ქალაქ ფაზისის ისტორიისათვის"(1941, გამოქვეყნდა 1969) პირველი ქართული მონოგრაფიაა ანტიკური ხანის საქართველოს ქალაქების შესახებ. პარალელურად იკვლევდა XIX საუკუნის საქართველოს საზოგადოებრივ-პოლიტიკური მოძრაობის და საზოგადოებრივი აზრის ისტორიას. საზოგადო მოღვაწე.

წყარო: საქართველო: ენციკლოპედია: ტ.I.–თბ., 1997.–გვ.412

• მასალები XIX საუკუნის პირველი ნახევრის ქართული საზოგადოებრიობის ისტორიისათვის (ავტორი). - თბილისი, მეცნიერება, 1980. - 250გვ.
• ქალაქ ფაზისის ისტორიისათვის (ავტორი). - თბილისი, მეცნიერება, 1969. - 206გვ.
• თბილისის საჯარო ბიბლიოთეკის ისტორიისათვის (ავტორი). - თბილისი, 1941