ანდრია ყარაშვილი

დაბადების ადგილი: ქ. თბილისი.

სწავლობდა პეტერბურგის კონსერვატორიაში 1878–1881წწ.; დაამთავრა ვარშავის კონსერვატორია 1885 წელს.

1894–1897წწ. ხელმძღვანელობდა ქართული დრამატული თეატრის გუნდს; 1895–1920წწ. დიდი ამაგი დასდო მევიოლინეთა ქართული კადრების აღზრდას თბილისის ქართულ გიმნაზიაში, 1905–1919წწ. ქართული ფილარმონიის სამუსიკო სასწავლებელში, 1920–1922წწ. თბილისის II კონსერვატორიაში; 1900 წლიდან თბილისის სათავადაზნაურო გიმნაზიაში დააარსა მოწაფეთა პირველი სიმებიანი კვარტეტი, რომელმაც პირველად შეასრულა მისი კვარტეტი "ლოთებო"(ალექსანდრე ჭავჭავაძის ლექსზე, "ლოთებო, ნეტავი ჩვენა"); მას ეკუთვნის აგრეთვე პოპულარული რომანსები: "ისევ შენ", "დავრდომილი, სნეული"; სავიოლინო პიესები: "ბაიათი", "პერპეტუმ მობილე", "ფუტკარი"; საფორტეპიანო პიესა "საზანდარი"(გუნდისათვის დაამუშავა ზ. ჩხიკვაძემ, შემდეგ ზ. ფალიაშვილმა. გავრცელდა "სამშობლოს" სახელწოდებით); სიმღერები: "მრავალჟამიერ", "პატარა გურია", დაუმთავრებელი ოპერა "ვეფხისტყაოსნის" ნაწყვეტები; მან აღზარდა ქართული მუსიკალური კულტურის მოღვაწეთა ნიჭიერი პლეადა; იყო მევიოლინე–ვირტუოზი(პირველი ქართველი მევიოლინე), საზოგადო მოღვაწე, ქართული სავიოლინო საშემსრულებლო სკოლის, ქართული სავიოლინო მუსიკის ფუძემდებელი, ქართული სიმებიანი კვარტეტის დამაარსებელი, საქართველოს ფილარმონიული საზოგადოების დამაარსებელთაგანი.

წყარო: ქართული საბჭოთა ენციკლოპედია: ტ. 10. - თბ., 1986. – გვ. 628; ქართული მუსიკის ენციკლოპედიური ლექსიკონი. – თბ., 2015. – გვ. 504

• საქართველოს ფილარმონიული საზოგადოება, ერთ-ერთი დამაარსებელი