პეტა აღნიაშვილი

დაბადების ადგილი: ქ. თბილისი.

სწავლობდა მოსკოვის უნივერსიტეტის იურიდიულ ფაკულტეტზე.

ოქტომბრის რევოლუციამდე მუშაობდა თბილისისა და მოსკოვის პარტიულ ორგანიზაციებში. 1917 წლის დეკემბრიდან იყო კავკასიის ფრონტის სამხედრო-რევოლუციური კომიტიტის შემადგენლობაში და აქტიურად მუშაობდა ფრონტის ტრაპიზონის უბანზე. 1918 წლიდან იყო საბჭოთა ხელისუფლების გამარჯვებისათვის აფხაზ მშრომელთა აჯანყების ერთ-ერთი ხელმძღვანელი. აჯანყების დამარცხების შემდეგ (1918 წლის მაისი) გადავიდა ჩრდილოეთ კავკასიაში და მეთაურობდა წითელი არმიის კავკავის ჯგუფს. 1919 წლის ზაფხულიდან ორგანიზატორულ მუშაობას ეწეოდა თბილისში, რისთვისაც დამოუკიდებელი საქართველოს პირველმა მთავრობამ დააპატიმრა. 1920 წლის იანვრიდან ხელმძღვანელობდა წითელი არმიის ნაწილებს სამოქალაქო ომის ფრონტებზე. საქართველოში საბჭოთა ხელისუფლების გამარჯვების შემდეგ იყო წითელი არმიის ქართული ნაწილების ერთ-ერთი ორგანიზატორი. 1921 წლის სექტემბრიდან საქართველოს სამხედრო და საზღვაო სახალხო კომისრის მოადგილე, შემდეგ ქართული დივიზიის უფროსი. მომდევნო წლებში მუშაობდა პასუხსაგებ თანამდებობებზე წითელ არმიაში, საქართველოს კომუნისტური (ბოლშევიკური) პარტიის ცენტრალურ კომიტეტში. სწავლობდა მოსკოვის წითელი პროფესურის ინსტიტუტში. 1932 წლის მარტში დანიშნეს საქართველოს სსრ სახკომსაბჭოს თავმჯდომარის მოადგილედ. 1933-1934 წლებში მუშაობდა საქართველოს კომუნისტური(ბოლშევიკური) პარტიის ცენტრალურ კომიტეტის მდივნად.  1935-1936 წლებში იყო ასფსრ სახკომსაბჭოს თავმჯდომარის მოადგილე. რეპრესირებულია, სიკვდილის შემდეგ რეაბილიტირებულია. რაფიელ ერისთავის შვილიშვილის მარუნია მაყაშვილის მეუღლე. რევოლუციური მოძრაობის მოღვაწე საქართველოსა და ამიერკავკასიაში.

 წყარო: საქართველო: ენციკლოპედია: ტ.I.–თბ., 1997.–გვ.265

• კომუნისტური პარტია, წევრი (1916-)

• წითელი დროშის ორდენი