ალექსანდრე ასლანიკაშვილი

დაბადების ადგილი: ქ. თბილისი.

დაამთავრა თბილისის სახელმწიფო უნივერსიტეტის გეოგრაფიის ფაკულტეტი 1939 წელს.

1957-1981წწ. ხელმძღვანელობდა ვახუშტი ბაგრატიონის სახელობის გეოგრაფიის ინსტიტუტის კარტოგრაფიის განყოფილებას, 1980 წლიდან იყო ამავე ინსტიტუტის დირექტორი. 1966–1975წწ. ქართული საბჭოთა ენციკლოპედიის კარტოგრაფიის რედაქციის გამგე. 1973-1981წწ. იყო თბილისის სახელმწიფო უნივერსიტეტის კარტოგრაფიისა და გეოდეზიის კათედრის გამგე. მისი ძირითადი ნაშრომები ეძღვნება კარტოგრაფიის ზოგადი თეორიისა და საქართველოს კარტოგრაფიის საკითხებს. თავისი შრომებით–"კარტოგრაფია. ზოგადი თეორიის საკითხები" და "მეტაკარტოგრაფია. ძირითადი პრობლემები", საფუძველი ჩაუყარა მეტაკარტოგრაფიულ კონცეფციას. ეს შრომები კარტოგრაფიული მეცნიერების ზოგად თეორიებს მიეძღვნა. ასლანიკაშვილმა ლოგიკური აზროვნების ფორმები, როგორებიცაა: შედარება, აბსტრაგირება, განზოგადება, ანალიზი, სინთეზი და მოდელირება კარტოგრაფიულ ასახვას დაუკავშირა და შესაბამისად, დეფინიცია მისცა: შედარების, ანალიზის, სინთეზის, აბსტრაგირების, განზოგადებისა და მოდელირების კარტოგრაფიულ ფორმებს. 1999 წელს ცნობილმა იაპონელმა კარტოგრაფმა ტოსიტომო კანაკუბომ იაპონურ ენაზე ქალაქ ტოკიოში გამოსცა ალექსანდრე ასლანიკაშვილის "მეტა-კარტოგრაფია". გეოგრაფიულ მეცნიერებათა დოქტორი(1969). გეოგრაფ-კარტოგრაფი.

წყარო: საქართველო: ენციკლოპედია: ტ.I.–თბ., 1997.–გვ.229

• საქართველოს მეცნიერებათა აკადემია, წევრ–კორესპონდენტი (1979-)

• 1971 - საქართველოს სახელმწიფო პრემია, "საქართველოს სსრ ატლასის" შექმნაში მონაწილეობისათვის
• საპატიო ნიშნის ორდენი

• საქართველოს ატლასი : მე-9 კლასის მოსწავლეთათვის (ავტორი). - თბილისი, ს.ს. "კარტოგრაფია", 2009. - 41გვ.
• საქართველოს ატლასი(XVIIIს.) (ავტორი). - თბილისი, კარტოგრ. ფაბრიკა, 1997. - 96გვ.
• საქართველოს სასწავლო-გეოგრაფიული ატლასი (ავტორი). - თბილისი, განათლება, 1992. - 36გვ.
• კარტოგრაფია (ავტორი). - თბილისი, მეცნიერება, 1968. - 298გვ.