რაჟდენ არსენიძე

დაბადების ადგილი: სოფელი სოჩხეთი, ტყიბულის რაიონი (ყოფილი ქუთაისის მაზრა).

სწავლობდა იურიევის (ტარტუს) უნივერსიტეტის იურიდიულ ფაკულტეტზე. სტუდენტობის წლებშივე მონაწილეობდა სოციალ-დემოკრატიულ მოძრაობაში. რსდმპ II ყრილობის შემდეგ მიემხრო მენშევიკებს. მუშაობდა თბილისის, ბათუმის, ქუთაისის, ბაქოს მენშევიკურ ორგანიზაციებში. თანამშრომლობდა გაზეთებში "ივერიასა" და "კვალში". მონაწილეობდა 1918 წლის 26 მაისს მიღებული დამოუკიდებლობის აქტის შედგენაში. 1919 წელს ეკავა იუსტიციის მინისტრის პოსტი საქართველოს დემოკრატიული რესპუბლიკის მთავრობაში. 1921 წელს, საქართველოში საბჭოთა ხელისუფლების გამარჯვების შემდეგ გაემგზავრა ემიგრაციაში; ეწეოდა ანტისაბჭოთა საქმიანობას. 1930–იან წლებში პარიზში მისი ხელმძღვანელობით გამოდიოდა ჟურნალი "სოციალისტური აზრი". იყო 1952 წელს მიუნხენში დაარსებული რადიო "თავისუფლების" ქართული რედაქციის პირველი რედაქტორი. სახელმწიფო და პოლიტიკური მოღვაწე.

წყარო: საქართველო: ენციკლოპედია: ტ.I.–თბ., 1997.–გვ.207; ქართველ მოღვაწეთა ლექსიკონი:1801-1952: ტ.I .-თბ.,2018.-გვ.203

• საქართველოს დამფუძნებელი კრება, წევრი
• საქართველოს სოციალ-დემოკრატიული(მენშევიკური) პარტიის ცენტრალური კომიტეტი, მდივანი

• განხილვა მეფე ვახტანგ მეექვსის კანონმდებლობისა. - პარიზი, 1963. - 271გვ.
• დემოკრატიული რესპუბლიკა (ავტორი). - თფილისი, ამიერ-კავკ. მუშათა ს.-დ. ორგ. საოლქო კომ-ტის გამოც.(სტ. "სორაპანი"), 1917. - 56გვ.