არსენა მარაბდელი

დაბადების ადგილი: სოფელი მარაბდა, თეთრიწყაროს რაიონი.

ბატონყმობის წინააღმდეგ მებრძოლი გლეხი XIX საუკუნის I ნახევარში. თავად ზაალ ბარათაშვილთან კონფლიქტის გამო იგი ტყეში გაიჭრა. გადმოცემის თანახმად, არსენა ვერ ურიგდებოდა გლეხობის ჩაგვრას, ყმებით ვაჭრობას, ყმების გაჩუქებას, მზითვად გატანებას. ებრძოდა მარბიელ მთიელთა ურდოებს, კოლონიალური პოლიტიკის გამტარებელ ჩინოვნიკებს, ჩარჩ–ვაჭრებს. ამის გამო ძალიან პოპულარული იყო საქართველოსა და მის მოსაზღვრე მხარეში. ხელისუფლებამ მის დასაპატიმრებლად რაზმი გაგზავნა. ბოლოს ფარსადან ბოდბისხეველის ღალატით შეიპყრეს, მაგრამ მალე ტყვეობას თავი დააღწია. არსენა მარაბდელის ანტიფეოდალური პროტესტი გლეხთა განმათავისუფლებელ მოძრაობაში გადაიზარდა. იგი დამნაშავედ იყო გამოცხადებული და პოლიცია სდევნიდა. არსენა მოკლეს მცხეთის მახლობლად, როდესაც მარტო მყოფი რუსეთის ჯარის ნაწილებს წააწყდა. ხალხური ტრადიციით, ოძელაშვილის მკვლელი იყო გიორგი კუჭატნელი.

წყარო: საქართველო: ენციკლოპედია: ტ.I.–თბ., 1997.–გვ.205; ქართველ მოღვაწეთა ნეკროპოლი. წ. 1/ შეადგ., წინასიტყვაობა, შენიშვნები და საძიებელი დაურთო სოლომონ ხუციშვილმა. -თბ., 1961. -გვ.84-85