დავითი (კათოლიკოს-პატრიარქი)

1673-1696წწ. იყო აფხაზეთის (დას. საქართველოს) კათოლიკოს–პატრიარქი; მან აღადგინა ოდიშის სამთავროში დასავლეთ საქართველოს კათოლიკოს-პატრიარქის უმაღლესი საეკლესიო უფლებები, რომლის ხელყოფა ოდიშის მთავარმა ლევან III დადიანმა სცადა; 1675 წელს დავითმა ლევან III დადიანს კათოლიკოსის საქმეში ჩაურევლობის პირობა დაადებინა; მისგანვე მიიღო საკათოლიკოსო მამულად ოდიშში ხოფი (ახლანდ. ხობი), ხოლო სადგომად და საძვალედ – ორი სასახლე და ხოფის ღვთისმშობლის ეკლესია; მტკიცედ იცავდა საკათოლიკოსო საკითხებს; მისი კათოლიკოსობის პერიოდში აფხაზეთის სამთავროში გაძლიერდა ქრისტიანული მოსახლეობის შევიწროება ჩამოსახლებული "აფხაზების" (აფსუების) მიერ, საკათოლიკოსო ყმების გაყიდვა; მან აფხაზთა მთავარს ყვაპუ შარვაშიძეს ფიცის წიგნი დაადებინა, რომ შეწყვეტდა საკათოლიკოსო ყმების შევიწროებას.

წყარო: საქართველო: ენციკლოპედია: ტ.2. – თბ., 2012. – გვ.287