ელიზბარ დავითიშვილი

XVII საუკუნის შუა წლების პოლიტიკური მოღვაწე; ბაგრატიონთა სამეფო სახლის საგვარეულო განშტოების დავითიშვილების – სათავადოს ერთ–ერთი აქტიური წარმომადგენელი; ფლობდა ქართლის სამეფოს ბოქაულთუხუცესის სახელოს; დავით დავითიშვილის გარდაცვალების(1635-1637) შემდეგ იყო დავითიშვილების ფეოდალური სახლის მეთაური, როსტომ მეფის წინააღმდეგ მოწყობილი აჯანყებების მტკიცე მოწინააღმდეგე, მეფის ელჩი ირანის შაჰის კარზე(ნ. ციციშვილის აჯანყების შემდეგ დატყვევებული ჩხეიძეები ირანში მისი მეშვეობით გაიგზავნა); მან მეფის უშვილობის გამო ლუარსაბ ბატონიშვილი ირანიდან ჩამოიყვანა და ქართლის ტახტის მემკვიდრედ გამოაცხადა; ამ მისიის დროს როსტომ შაჰის მიერ ბოძებული ხალათიც ჩამოუტანა; თეიმურაზ I–ის დამარცხებისა და მისი ძის დავით(დათუნა) ბატონიშვილის დაღუპვის შემდეგ ბატონიშვილისა და სხვა დახოცილ თავად–აზნაურთა თავები, თეიმურაზ მეფის დროშასთან ერთად, ირანის შაჰს მიართვა; მას ირანში მოღვაწეობის გამო სათანადო პატივიც მოუპოვებია; ირანის შაჰმა განჯაში სამფლობელოდ სამი სოფელი უბოძა.

წყარო: საქართველო: ენციკლოპედია: ტ.2. – თბ., 2012. – გვ.290